Constituency puri mulungba party nung noktaktsü: Dr. Temsüwati

Mokokchung| 17 Aenjeti (TYO): Constituency sangertemi mulungba party nung dang election nung tokteptsü aser terenlok mapa aser lanur mapa mungui alirtem asoshi inyaktsü tejangraba lir, ta ashi. Iba o ya Rasemnü (Bodbarnü) Dr. Temsüwati-i 27 Mokokchung Town Assembly Constituency nungi candidate ka ama noktaktsü sangdongba sentong ka yangi Aongza ward Mokokchung nung alidang metetdaktsü.
‘Ni asoshi yimden telok (political party)-ji tongtibangba masü aser political party nung temulung malemer, saka shibai nüburtem asoshi alir aser inyaker, ibaji ang tongtibangba lir, anungji, 27 Assembly Constituency sangertemi koba yimden telok nung iang ta shidir iba nungji aitsü’, ta Dr. Temsüwatiisa ashi.
Mokokchung district ya tangari tejakleni aoba district ta züngshir, aji saka, yangi institution tajung mali, tzü peria mangur, light tebilemtsü lir, lenmang majung, mozüki tajung mali aser tongtibangsa lanur mapa mungui aliba tebilemtsü ya ulura, anungji, item atemaji khuret süa bilemyong tanü pa election nung noktaker, ta ashi.
27 Mokokchung Town A/C ya lenla balala nung tatishitsü aketba constituency ka kümdaktsütsü aser constituency sangertem atema central nungi mapatong tasen aika bener arua terenlok mapa inyaktsütsü mangdang tulu lir, anungji, pa nem khen yimsü asütsütsü maongka agüjang ta mepishia liasü.
Tanü lokti tebilemtsü balala adokba ya tongtibangsa terenlok maliba ajanga lir, anungji, “Ni terenlok mapa aser lanur mapa mungui alirtem asoshi lenmang balala bushia inyaktsü” ta paisa shisem.
Temelenshi ka adoktsü asoshi akhi putu inyakyim indoker, tanü tensa den apet inyakyim tasenba nung tejakleni lungjemer mera aotsü asoshi paisa nüburtem dang mulungsentsü melenshitsü asoshi ayongzüka liasü.
Dr. Temsüwati ya Longsa nunger asür Nokmesoba jabaso lir. Pa NEHU Shillong nungi M.A Economics azüng aser pa sorkar tenzükba menden balala nung inyaka arur, 2015 kümto Additional Development Commissioner Planning (GoN) tashi inyaker sodi angu. Pa ya 2015 kümto BJP nung züngsem ka küma Nagaland State Executive member ka ama inyaka liasü, aji saka, tang aruya aliba election nung yabo nüburi mulungba party nung dang shilem agitsü telemtetba agia lir.
Tanü iba sentong nung Mokokchung Town Baptist Arogo Assoc. Pastor P. Toshi-i temoatsü meshia sarasadem. Sentong nung 27 Mokokchung Town A/C kübok ward balala nungi lenirtemi mapang tatsütsü agia jembi. Aongza Ward Chairman Longritemjen-i tarurtem agizükba o jembi aser Lanuzenba GB-i tepela o lemsatepa liasü.