Constitution Day nung PM Modi-i Parliament nung jembitsü

New Delhi, November 15 (Agencies): November 26 nü Constitution Day anogomong nung Ato kilonser, Narendra Modi-i Parliament teloktep senden nung jembitsü.
Iba dak alia Constitution Day nüngtem nung Bharatiya Janata Party (BJP)-i anogo 10 nü sentong ayongzüka agitsü.
BJP Tir, Amit Shah-i district ajak nung party ketdangsertem aser lenirtem dang iba anogo nung Ato kilonseri onük jembibaji screen nung sayatsü tuyuogo. Paisa party lenirtem dang district centres ajak nung November 27 nungi December 6 tashi shisashirtem senden ayongzüka akatsü metetdaktsü.
Iba senden jakdang lenirtemi India linük temzüng yanglusang aser Bharat Ratna angusang, BR Ambedkar nem tama akhüm agütsütsü.
Ambedkar-i jembiba otemji party lenirtemi nüburtem nem metetdaktsütsü, iba denji külemi linük temzüng nung aliba fundamental temeden balala aser teinyaktsü balala onük nung o lemteptsü.
Item senden nung lenirtemisa Modi-i aniba sorkari Ambedkar mangdang ataloktsütsü atema inyakbatem nung o lemteptsü.
BJP working president JP Nadda-i, MP tem, MLA tem, office ketdangpurtem aser party nung inyaker ajak dang item sentong nung jangrabangra adentsü metetdaktsüogo.