Contact lens agir mejangba ajanga tenük nung timtem adoktsü

Contact lens magizüki mejangba ajanga tenük nung timtem adokdaktsütsü aser iba ajanga meyilongi tenük pokdaktsütsü ta scientist temi sangdong ka ajanga metetdaktsüogo. Annals journal nung osang trok ajanga contact lens junga magiba aser junga anepalu masüba ajanga cornea infect sütsütsü aser iba ajanga microbial keratitis amala timtem agütsütsü.
“Contact lens agir mejangba ya kanga dang lendong lir aser iba ajanga tenük nung kanga mejungi kongshitsü mesera mapang kar nungbo tenük tena pokdaktsütsü,” ta University of New Mexico nung assistant professor Jon Femling-i ashi.
“Contact lens agir amoa aoba mesera tenük amor mangadaka aliba ajanga temang nung health tebilemtsü tulu adokdaktsütsü akok,” ta Femling-i ashi.
Contact lens agir hopta nung asem nungi pezü aonung tashi mejangba aser lense agir tzü awaba ajanga nisung ka tenük kanga merema akümba aser jangjaa mangüba asatetogo. Pa bacterial aser fungal microbial keratitis agi kangshiba puteta liasü. Kasa mapang nung tetsür chanu ka tetuyuba magütsüi drug store nung lense alia ibaji agir mejangba ajanga timtem adokba nguogo. La dak corneal ulcer adok aser iba ajanga tenük nung tarak adokdaktsü.
Maneni nisung kati kasa lens hopta ana atonga agiba ajanga perforated cornea, bacterial infection agi adongba putetogo aser iba ajanga pa tenük tachichilen transplant asütsüsa aküm. “Lens agir mejangba ya kanga lendong lir koba adolescent aser adult shirnok lens agir parnok dak tali ataloker. Tenük infect asüba nungi jenboa linüra tenük kanga junga anepalutsü nüngdaker,” ta iba bushisüngdang lenir Femling-isa ashi.