Copa America: Argentina o Panama nati takok angu

Santa Clara, June 07 (Agencies): Argentina’er tongti football asayar, Lionel Messi yirua shilem magitettsüsa tia ajuruaka, par teloki goal 2-1 agi defending champions, Chile telok madak takok ngua tang tasayadak Copa America Centenario football asayamong nung yashi, Hombar nü shilem agiogo.
Taoba May ita Honduras telok den asayaba friendly asaya nung teberem yiruba yong Argentina captain, Messi-i yashi asaya nung shilem magitettsüsa aküm saka külem asayartemi kanga junga asayaba ajanga par Argentina teloki par tetenzükba Group D asaya nung takok ngua liasü.
Yashi asaya tenzüker minute 51 buba nung Angel Di Maria-i goal 1 agüja par Argentina telok temaba jenjang nung ajungkettsü.
Külem asayar, Ever Banega-ia minute 8 shi süir külen par telok asoshi tanabuba goal agüja par telok nem takokba bener arutsü.
Tesülen, injury added time nung Chile substitute asayar, Jose Fuenzalida-ia goal 1 agütsü saka par teloki yashi tamakok ngua liasü.
Ano külen, Panama telokia goal 2-1 agi Bolivia madak  Orlando yimti nung takok anguba osang jangjaogo.
Yashi asaya tenzüker minute 11 buba nung arishi küm 35 tain striker, Blas Perez-i goal 1 agüja par Panama telok temaba jenjang nung ajungkettsü.
Ajisüaka, Bolivia asayar, Juan Arce-i asaya tenzüker minute 54 buba nung goal 1 agüja par telok anaprongla kasa jenjang kümdaktsü.
Yamaji asayar külen, Perez-isa asaya tembangtsü minute 3 shi anünga alidang tanabuba aser takokba goal agüja par Panama telok nem takok ngudaktsü.
Tan mezüngsüa Copa America asayamong nung shilem agir, Panama teloki tanü tashi World Cup finals nung shilem agitsü temeten monguteti lir.