Copa America: Colombia telok quarterfinal-i iogo

Copa America: Colombia telok quarterfinal-i iogo

Paraguay telok madak goal 2-1 agi takok ngua US kübok Pasadena nung asayaba 2016 Copa America football asayamong Group A asaya nung Real Madrid asaya, James Rodriguez-i par Colombia telok asoshi 1 buba goal agütsür pelaba noksa ka yangi angur. (Pasadena, June 08)

Pasadena, June 08 (Agencies): Colombia teloki goal 2-1 agi Paraguay telok madak takok ngua, tang tasayadak 2016 Copa America Centenario football asaymong quarterfinal asayatsü jenjang yashi, Mongolbar nü ajangzükogo.
AC Milan asayar, Carlos Bacca aser Real Madrid asayar, James Rodriguez nati goal kaka agütsüba ajanga par Colombia teloki takok ngua, tan asayamong quarterfinal asayatsü jenjang angur mezüngbuba telok aküm.
Yashi asaya tenzüker minute 71 buba nung Victor Ayala-ia par Paraguay telok asoshi goal ka agütsü saka par teloki yashi tamakok angutsüsa jenjang ajuru.
Tan takok anguba sülen Colombia teloki par Group A nung temaba jenjang angur telok ana rong nung densemtsü jenjang angur lir.
Costa Rica den tan Honibar nü asayatsü lemzükba asaya nung Colombia teloki tajemba agi draw jenjang ngutetra, par telok Group A telok nung temaba jenjang angur akümtsü.
Ano külen, US telokia goal 4-0 agi Costa Rica telok madak takok ngua yashi asayaba osang jangjaogo.
Yashi asaya nung US striker, Clint Dempsey-i asaya tenzüker minute 9 buba nung goal 1 agütsüba sülen külem asayar, Jermaine Jones aser Bobby Wood natia asaya mezüngbuba shilem nung goal kaka agütsüba ajanga par US telok goal 3-0 agi temaba jenjang ngua liasü.
Yashi agütsüba goal-ji Dempsey-i international goal 50 buba agütsür liasü.
Tesülen, asaya tembangtsü minute 3 shi anünga alidang, US substitute asayar, Graham Zusi-i 4 buba aser takokba goal agüja par US telok nem takok ngudaktsü.
Coach Jurgen Klinsmann-i aniba US teloki par tatembangba Group A asaya Paraguay den Philadelphia nung tan Honibar nü asayatsü.

You must be logged in to post a comment Login