Copa America: Colombia teloki Peru tsükdakja semifinal-i ai

Tang tasayadak Copa America Centenario asayamong nung Peru madak goal 4-2 agi takok ngua semifinal asayatsü jenjang anguba sülen Colombia asayartem pelatepba noksa nung angur. (New Jersey, June 18)

New Jersey, June 18 (Agencies): Arsenal goalkeeper, David Ospina-i kanga junga asayaba yong par Colombia teloki penalty metsütepba ajanga goal 4-2 agi Peru telok madak takok ngua tang tasayadak Copa America Centenario asayamong semifinal asayatsü jenjang yashi, Hokolbar nü ajangzükogo.
Yashi asaya nung Ospina-i par Colombia telok nem goal ka danga magütsüdaktsüba den külemi, penalty metsütepdanga Peru defender, Miguel Trauco-i metsüoktsüba ball pua kangasa junga asayaba yong par Colombia teloki takok ngua liasü.
Yashi asaya mapang, minute 90 tembangba mapang tashi nung telok anapronglai goal ka danga magütsüteti kasa jenjang anguba yong takoker shimtsü asoshi penalty metsüteptsüsa aküm.
Penalty metsütepdang Colombia asayar 3-i goal takok ngua metsüba sülen Ospina-i Trauco-i metsüoktsüba ball puadokba yong par Colombia telok jenjang tajungba küma liasü.
Tesülen, Sebastian Perez-i par Colombia telok asoshi 4 buba goal takok ngua metsüoktsüba sülen Peru asayar, Christian Perev-i ball goalpost temalen metsüdokba yong Colombia teloki yashi goal 4-2 agi asaya koka semifinal asayatsü jenjang tajung angu.
Colombia teloki par semifinal asaya Mexico mesüra Chile na rong nung ka den taruba Bodbar nü asayatsü.