CorCom-i Manipur ghonda 18 mokdang

Imphal, October 21 (Agencies): Manipur nung telungpur telok aikati akümba Coordinating Committee, CorCom-i ghonda 18 longkak aita state mokdangba ajanga Imphal nung dokan, school aser shishilemdak shibanga yimti kanga azüngmeyaka liasü.
Ajisüaka nisung karbo pei teinyaktsü tim inyaka mongogo.
Lisopur kati, “Onokia mokdangba ya maginer, ajisüaka onoki kecha meinyaktet. Onoki mechiyungi melitettsü aser study asürtema lir, ibayongji onoki tsübuaka kimai adoka onoki taküm alitsü atema inyaker,” ta ashi.
Kwairamband Keithel aser Thoubal densema lenden nung aliba district tem nung shishilembadak ajak shibanga liasü.
Imphal nung aliba Ima market nung shishilembartem kanga takoksa nguogo, kechiyong mokdangba ajanga shishirtem maliasü.
“Iba ama tensa ka nung onoki kimai adoktsü tsübur saka onoki tepok mesütsü atema aatsü tanga lenmang maliba ajanga kimai adoktsüsa akümer. Onok asütsüsa amokmerenaka mesüra shirangaka onok tanga lenmang maliba ajanga kimai adoka market nung shishilembatsüsa akümer,” ta yokyayokchir tetsür kati osangbener dang ashi.
Interstate bus services-a mesenzüba ajanga ainlen senzürtemi timtem kanga ajuruogo.
State nung maongka aika liaka  mapangshia telungpurtemi state mokdangba ajanga terenlok tsütsü ongdang tulu adoker.