Corona Virus indang kü tangatetba

– Dr Toshimanen Ozukum Kohima.

Tang alima ajunga nung pusateba tsüputepba tashidakji iba CORONA VIRUS ya lir. Ni osang kaket ka nung züngshibaji iba virus ya küm 40 tejaklen China nung nisung kati fiction film yangluba nungi adok sudi ta bilemer. Pai lab nung chemical tapu aika amshia yanglu aser iba yagi alima ajak sünga nisung jenti asüba iba film nung sayu ta ashir. Iba lab-ji raksar tanü nisung daki yir iba shirang ya tenzük ta ashir.
Kodang Temeshi Lai nung reprangdangdir, Jongkai Adok tapu 6: 9 nung yamai shia lir ….Aser tasü yimi pa sülen anidak. Aser nok agi, ayawara agi,tashidak agi, aser arem shiruru agi alima pezüsü nung shilem ka tepsettsü asoshi parnok nem tashi agütsü.
Anungji iba tashidak ya alima nung mekübloktsüba Tsüngrem terasaba marokji südi ta bilemer. Iba ya ajanga China nung nisung jendi Laishiba azüngtsü tenzükogo ta osang ajanga angazüker. Tang alima nung kaket timba menüngbaji Laishiba ya lir ta ashir. Iba tashidak wara yagi asen Yihuva Tsüngrem ya ochiba Tsüngrem, ajak takoksang Tsüngrem aser tatem maka chuba ta küli agütsür ( Yiremia 10:10).
Iba ya asenok Yisu Khrista dak chichia amanger Khristantem asoshi Tsüngrem nangzükba jungkai adokba mapangji lir. Anungji asenok onsara tsübuteptsüba masü saka Kibuba dak jenoktsü mapang ta asenok kümdangdaktsür. 2019 December 31 aonung ozü kinunger aonung sarasademba mapang nung tetsüi “ASEN KINUNGER AJAK TAONUNG SARASADEMER MEJANGDI ASER ASÜNGNEP NEW YEAR, JANUARY 1, ASOSHI TSÜNGREM DANG LAISHIBA KAKA MESHIR IBAJI ASÜNGNEP SARASADEMDANG SHISHITEPDI” ta shir mejang. Nia ‘Tsüngrem, 2020 küm nai arishi moatsüra kü nema Laishiba tekong ka moajang’ ta sarasademer mejang. Anepdang sakdang kü nem agütsüba Laiji ya liasü, ‘SHIBAI TEMATIBA JENOKDAK ALIR PAI AJAK TAKOKSANG AKÜMPOK NUNG ALITSÜ. T. KEN 91:1
Ya Khrista dak amangertem asoshi tamang akangshitsü aser sarasadem nung tashi lir ta bilemtsü mapang tajung lir. Anungji ABAM aser NBCC aser Mongdang balalai sarasadem ayongzüka agitsü sangdongtsüla. Arogo aser telok balalai sarasademtsü ayongzükba asoshi pelar. Maneni tasü ita kati ka sarasadem nung akangshitsü mapang tajung ta bilemdi.
Ano iba tashidak wara dang tamajungba adalokyonga aotsü menua mali. Jongkai Adok 9: 10 nung yamai shia lir… Ita pongu tashi nisungtem kangshitsü ainji parnok tepen nung liasü. Kechi arudir arung asenoki Kibuba dak jenoka lira tetsübu malitsü. Tanü putu nung nisungtem onsara jabujaritepa, yi jemtepba aser apangteber tsügnsangba benjong agi mezüpelanger teyanglur Tsüngrem amadokba agi Tsüngremi nisung tsüngda nung tepila ayutsü atema iba wara ya yok südi ta bilemer, kechiaser doctortemi ashiba agi nisung o nisung na teka agi-angsüng mesalemtsüla, tejak jeteber o mejembitsüla, nisung o nisung na tsüngda nung feet kabosa yurang o jempitsüla ta ashir. Anungji tebur o tebur na shi nung medemba aser tetsür o tetsür na shi nung azüaponga menakteba kazüba aser ibaji ozüngi melaba ta ulta ozüng yanglur shiruru danga tamajungba temenen mapa inyakba ngur Teyanglur Tsüngrem onsara mepelaba ajanga iba wara ya yok südi ta bilemer.
Anungji iba tashidak wara ajanga nisungtem Tsüngrem bushitsü mapang tajung ta asenok ajaki sarasadema Tsüngrem dangisa meyipdi. Iba wara ya Tsüngremi dang aneptsütsü akok, kechiaser na anepdaktsüba Kibubaji ni lir ta Anitet 15:26 nung shia aliba dangisa meimchirtem meyiptsü kü tamang aser teimla lir ta iba ocet ajanga ayongzüker. Tsüngremi Pa chirtem kümzüka yujang, Amen.