Corona Virus

– Talitemjen Imchen.

Tanü alima nung coronavirus tashidak adoker, iba tashidak koktettsü atema mozü menguteti shirangtepba mapang lir. Taoba mapangtem nungbo, makamait mesüra timtem kar ajurudang, America England Russia amala, parnoki anir, rongsen lenmang süshia, nok o nü tsütsü süshia, teyari agitepa timtem dang tongzüktep aser nüngdaktem peritepa aru. Tanübo iba coronavirus wara ya, America nungeri tetsübuba, England nungeri tetsübuba, Russia nungeri tetsübuba lir. Missile agi kadangtsü makoker, mozü tajungtiba agi manepteter. Shiba dak temolung lema shir dak teyari asüngdangtsü? Alinük takar makar, tulu tila ajaki iba coronavirus wara tsübuba mapang ka.
Raradang amshitsü nok o nü tesashi, tayimtsü tapu balala, jahaz tapu balala, injang merangpong aser bomb paika yangluteta akaba to, iba coronavirus wara matsüngdangbo nüngdak mali amajok kümogo. Tongpang nung raratepdang wainshina rarateptsü atema arangtet (training) balala agir ajak to, pei pei nok o nü amshiba ajak doktsür, kilempoki iba coronavirus wara tsübuba agi aita lir. Shishilemadak tesemtem, kaketriju aser lokti sendendak tesem ajak shipangogo. Iba wara nungi jenputsü asoshi scientisttem-i tang tashi ngutetba ajak agi, wara nungi ajentsüla. Nisung o nisung na yongtsü nung kanga anasatepa melii kipok nung atsüker alitsüdang.
Iba coronavirus wara tashidak agi alinük ajunga nung atonger aser nisung aika tekümzüklen tajung mengui asür. Joko linük balala nungi Tirtem aser Ato kilonsertem kati ka anemteper masü saka coronavirus tashidak kodaser akoktsü jembiteper. Linük ka nungi teyaritepertem, wara jagi atongnungbo asütsü ta meteta liaka, kibong aser kinünger matsüngdang teka ayiploktsür, linük kati or ammangi sangwa küma shirangertem yariteper.
United Nation Organisation (UNO) ajanga coronavirus wara aliba agi alima ajunga Emergency sangtongogo. Koba tetezü alima lentongpang nung lir. Asen lima yimtsüng kar nung iba wara ya aru asübo, yim ajunga mekümzükteti asütsü menua maka. Asenok ajak tinyaktsü ka ka lir. Alima ozüngi wara nungi kümzüka alitsü indang kechisa ashir, asenoki ajemalua tashi angatsü nüngdaker.
Coronavirus wara ya Tsüngrem-i meteta lir. Alima nungi kodang iba wara agintsü Pai meteta lir. Tsüngrem tenüng amer nepurtem kati ka tepsetteper. Ano Pa tenüngsang ken tena, Pa temeshiba Lai o zünga telok kati telok ka makdoktsü atema, nok o nü tesashi yangludenba jagi alima sünga kümogo. Tsüngremsa tajungbaji, meimchir ajaki Pa tali jangjaa metetdaktsütsü asoshi, iba tatasaba wara coronavirus ya alimai yok asü ta tashitemeteter aikati shisadanger. Aseni dang, Tsüngrem-i molungba amaji kodang liteta, Pa molung chidaktsüdir, Tsüngremi alima nung iba wara ya bener oadoktsü.
Alima nung mamangertem aika dang lir. Mamangertem-i yanglutetba nok o nü aika tagidak mali kümogo. Parnoki iba coronavirus ajanga Tsüngrem ka lir ta metettsü nibo kanga tamang akar. Aser tamangertem-ia, temolung nung balaka aser tepang agi balaka ta amangtsü masü, saka adangji nung, iba coronavirus wara ajanga Tsüngrem tali jangjaa metetba ka südaktsütsü ayongzüker.