Coronavirus ajanga Meghalayan Age Fest athir

Shillong, March 6 (Agencies): Meghalaya sorkari Meghalayan Age Fest athitsü aser nisung teshimtet kar dang jaoka Meghalayan Age conclave & conference agitsü telemtetba agiogo.
Iba benjung ya March 7-15 tashi West Jaintia Hills district kübok Thadlaskein nung amongtsüba liasü.
Hokolbarnü Shillong nung osangbenertem den jembidang chief minister, Conrad K Sangma-i ashiba agi “ni Meghalayan Age festival atema tourism, health aser Home department ketdangsertem aser chief secretary den senden ka amen.”
“Ministry of health and family welfare, Government of India aser Department of health and family welfare, Government of Meghalaya-i COVID-19 (Coronavirus) tema tekümdangtsü osang sangoktsüba Tourism department-i süoki ia bilemer” ta Conrad-i ashi.
Alima ajungalen iba wara ajanga timtemba angateta tourism department-i benjung mamongtsü aser Meghalayan Age conclave & conference dang agitsü lemtet, ta paisa ashi.
Health and Family Welfare department-i nisung telok madenshitsü osang sangoktsüogo aser iba jagi anogo asemnü benjung nung kenten sentongtem aser air balloon rides malitsü, ta CM-isa metetdaktsü.
Linük nung COVID-19 wara adokba nungi kümzüka alitsü atema Meghalaya-i tesem balala nung mozü ki 13 tashi shimer isolation wards lapoktsü, ta paisa ashi.
Meghalaya nung COVID-19 agi shiranger ka dang puteta mali aser iba virus noktangtsü atema mapa inyakdar, ta Health minister, A L Hek-ia ashi.
Meghalaya nung nija mozükitem danga teinyaktsü tim inyaktsü tetuyuba agütsüogo aser airport balala nung nisungtem screening asür, ta paisa ashi.
Meghalaya nunger kaketshir 61 tashi China semdanger aru aser parnok anogo 28 atema observation nung yua lir. Kaketshirtem 54 dak virus maliba putetogo aser tanüngba nisung tenet jungjunga reprangdar, Chief minister-i metetdaktsü.