COVID19 mazüokteter; tebilemtsü tuluba akümer

New Delhi, March 6 (Agencies): Coronavirus ajanga Punjab nung Attari-Wagah arrtsü nug anogoshia Daily Retreat sentong agiba nung public medendaktsütsü ta Border Security Force (BSF)-i Hokolbarnü metetdaktsüogo.
Hombarnü India nung coronavirus agi shiranger nisung 31 ajungba sülen iba osang ya sangoktsü. Tanü Delhi nung alir ka dak coronavirus aliba putet aser pa ya Thailand aser Malaysia-i orr aruba liasü.
Novel Coronavirus (COVID19) wara adokba mapang medical masks aser hand sanitizers miima bendena ayurtem ozüng tesashi agi merenshitsü, ta Centre-i Hokolbarnü metetdaktsü.
Osang balala sangdongba nung ajemdaker, Hokolbarnü Parliament complex telungi visitors aruba noktangtsü lemtetogo. MP
Holi atema sodi agiba sülen Bodbar nungi Parliament session tenzüktsü aser iba mapang MP temi parnok indang visitors anir arutsü memelatsü.
Bhutan linük nunga coronavirus aketer mezüngbuba putetogo aser ibaji US tourist ka dak putetba lir, ta Prime Minister Lotay Tshering-i tanü metetdaktsü.
Arishi küm 76 tain US tourist ji March 2 nü India nungi Bhutan-i aru aser pa March 5 nü temang meta shirangba atema mozü kidang aniok. Pa dak COVID-19 aliba putetogo, ta Prime Minister-i ashi.
Tanü World Health Organisation (WHO)-ia coronavirus indang tekümdangtsü metetdaktsüba nung “coronavirus ya tanga linüktem nung China dang nungi 17 ben agi tekaraba menatepa aoer” ta ashi. .
Coronavirus ajanga India nung Holi benjung akhi ama memungteter, Bethlehem nung Nativity Church shibangog aser Italy nungertemi nursing homes nung kinungertem taintem den majurutepdaktsür.
Europe nung coronavirus mezüng adokbaji Italy nung liasü aser iba linük nung mapa inyakertemi latex gloves agir school gate nung ‘closed notices’ enokyonga ao. Italy nung anogo 10 nü atema education system shibangtsü tenokdangba ka agütsüogo.
Italy sorkarisa April 3, 2020 tashi saisapong meimba nisungtem stadiums-i maotsü tenokdangba ka agüja lir.
Italy sorkari yashi tetuyuba ka agütsüba nung “nisung o nisung na tsüngda 1 meter (3 feet) bosa tepila ayutsü, nursing homes nung aliba kinungertem semdangi maotsü aser tainten nüngdak melira kimai malutsü” indang shia lir.
Brihostobar tashi nung Italy nung coronavirus ajanga nisung 148 süogo aser nisung 3,858 dak iba virus aliba puteta lir.
Iran linük nunga iba virus ajanga nisung 107 süogo aser parnoki schools aser universities ajak shibangogo.
Iran nunger dang shidi sen mamshitsü tayongzükba agütsüogo. Taoba mapang Iran foreign minister atema adviser Hossein Sheikholeslam (60) iba virus ajanga asüba osang aser Iranian state TV-i metetdaktsüogo.
Iran nunger tourist 450 shi ka taküm February nung India semdangi aru aser parnokji Tourism ministry-i bushitepdar, ta ketdangsertemi Hokolbarnü ashi.
Iran sensotem atema ‘travel advisory’ magütsüdang tourist temji India-i aruba liasü aser Health ministry-i parnok bushitsü atema osang agütsüogo.