Coronavirus nokdangtsü atema China-i India yaritsü melunga lir

Beijing/New Delhi, March 23 (Agencies): China linüki Coronavirus anema sashia raraba mapang nung India-i teyari osettem yokba atema pelaba lemsatepa Hombarnü China-i, India nung iba tashidak anema raratsü atema China-i ajangshibatem nung ajemdaker shisatsü agi India yaritsü melunga lir aser teyari osettem yoktsü melunga lir, ta metetdaktsüogo.
February 26, 2020 nü Indian Air Force (IAF) tayimtsü ka nung medical supplies seret 15,000 bener China nung coronavirus tashidak agi mejungi kongshiba yimti, Wuhan-i oa liasü. IAF tayimtsü nungji masks, gloves aser tanga medical osettem densema medical supplies ton 15 (kg 15000) bener yoka liasü.
Beijing nung osangbenertem den jembidang Foreign Ministry otongdar, Geng Shuang-i, China nung coronavirus poktetba mapang nung asenok yarir linük 19 nem China-i teyari agütsütsü melunga lir, ta metetdaktsü.
Item linük 19 nungiji India bo mezüngsemba dak sendakba nung tasüngdangba ka langzüdang Geng-i, India aser China na tsüngdabo tetsüdaktsü kecha mali, ta ashi.
“COVID-19 poktetba sülen China aser India na tongtepratepa arudar aser linük ana tsüngda amalitepa inyaker. Ato kilonser Modi-i aria bilemtsüba shidi ka yokogo aser Indian foreign minister-ia phone ajanga China ketdangser den jembiogo,” ta ashi.
China ketdangserisa, “Asenoki India tsütsü nungi teyari nguogo, aser iba atemaji pelar. Iba tashidak prokba mapang ka nung India nung tensaji onoki meteta lir. Nütsüng billion ka dak tema aliba linük anaji China aser India na dang lir. Iba tashidak ya ajak asoshi tayongzükba ka lir aser onoki ajangshibatem India den lemsatepner aser nüngdakba teyari balala agütsüner,” ta metetdaktsü.
March 22 tashi nung China nung nisung 81,093 dak iba tashidak putetogo aser iba nungjagi nisung 3,270 bo süogo. Nisung 5,120 treatment tagidak lir aser nisung 72,703 bo anepogo, ta China’s National Health Commission ajanga metetdaktsü.