Coronavirus nokdangtsü atema tekümdangtsü sangdonger

Kohima, March 19, 2020 (TYO): State nung Novel Coronavirus (COVlD-19) nokdangtsü aser azüoktsü atema rongdak mera balala agia inyaktsü nüngdak, ta Brihostibarnü Principal Secretary to the Govt. of Nagaland, Abhijit Sinha, IAS-i sangdong ka ajanga nüburtem dang metetdaktsüogo.Kohima, March 19 (TYO): State nung Novel Coronavirus (COVlD-19) nokdangtsü aser azüoktsü atema rongdak mera balala agia inyaktsü nüngdak, ta Brihostibarnü Principal Secretary to the Govt. of Nagaland, Abhijit Sinha, IAS-i sangdong ka ajanga nüburtem dang metetdaktsüogo.Iba tashidak nokdangtsü atema teinyaktsütem:* Tamangba yimsü dak sendakba lokti tentet ajaki lokti tulu adenshitsüsa sentong mayongzüktsü mepishir.* Tamangba yimsü dak sendakba lokti tentettemi pei züngsemtem aser nüburtem dang tsünglanglen aliba osangtsüsang sangdongtsü atema peipei sabang amshitsü mepishir:a) Lokti aliba tesemtem nung tangar anasa maotsü, Tenla ki, centres, hospitals, shopping malls, bazar, restaurants aser public transport ama lokti aliba tesem nung tangar dang nungi metre kabo tetsüngda aittsüla.b) Nüngdak kanga melira ainlen mesenzütsüla, lokti alidaki maotsüla aser akok tashi bazar-i maotsüla.c) Lokti dak sendakba sentong mepaidoktettsüsa süra item sentongtem nung nisung kanga ajema jaoktsüla.d) Kishi, table aser handrail ama mapang shia kongshiba osettem merüka ayutsüla.e) Yimra atongba, aketba mesüra wara agi shirangba temaitsü aliba nisungtem anasa maotsüla.f) Salem masütsüla mesüra mazüteptsüla.g) Tejak nung mekongshitsüla, aketdang aser hajidang teni-tebang nembangtsüla.i) Shirangertem, kanga taintem mesüra diabetes, temelungjang tashidak, tezüngjang tashidak, obesity, cancer aser tanga chronic tashidak alirtem majurudang teka mapang shia shidoktsüla; kidang shirangertem atema temeja tesem ka yutsütsüla. Lokti aliba tesem den moapu nung metsü memetsütsüla.j) Aketer aser temang metaa shirangertem yaridang teni-tebang nembangba mask agitsüla.k) Nagaland adener tangalen azünger aser alirtem shirnoksa March 15, 2020 anogo nungi tenzüka tanü tashi nung state telungi aitogo, parnoki teyari agitsü mesüra screening agitsü atema helpline numbers- 9856071745/ 7005539653 nung tongteprateptsüla mesüra Health & Family Welfare Department, Government of NagaIand indang nlssu.idspu.nic.in dangi mail asütsüla.l) Social media nung mejangjaba osangtem aser olulu meproktsüla.