Coronavirus ya China Lab nungi adok: US Republican

Washington, Luroi/August 02 (Agencies): COVID-19 tashidak wara adokdaktsüba virus ya China indang research facility nungi temai adok ta kuli aika nguteta lir, ta US Republican temi Hombarnü osang ka sangdonga US itdangiter temi metongjemteti aliba tatem kati arudaktsür.

Osang ajangasa ashiba agi, US mongintem aser China nungeri yaria aser US sorkari senotsü agüja Wuhan Institute of Virology (WIV) nung nisung dak menaloktsütsü asoshi coronavirus yanglushitsü atema inyaker aser iba amala inyakyim yabo miimshia alitsü akok ta kuli peria lir.

House Foreign Affairs Committee nungi Republican telokaba, Mike McCaul-i par committee indang Republican staff indang osang ya sangdonga liasü. Alima nung nisung million 4.4 tepsetba COVID-19 tashidak wara poktetba indang party balala lungjemer bushisüngdangtsü parnoki ajungshi.

Wuhan nung aliba facility nungi coronavirus ya nisungi yanglushir temai adokdaktsü, ta tai tonglokja aliba China-i magizüker, koba nung kuli mongutetaka mongin kari tamang akar. COVID-19 ya 2019 küm Wuhan nung mezüng puteta liasü. Ajidang masü iba tashidak temai adokba miimbangtsü merang ta aitsüba Beijing-i magizüker.

Mongin kari iba tashidak wara ya Wuhan Institute of Virology anasa tzü nungi adokba chiyongtsü ayokdak tesem ka nung shiruru virus ka nisung dak menaloka tenzük südi, ta temolung melemi bilemer.

“Tzü nungi adokba chiyongtsü ayokdak nungi iba tashidak ya tenzük ta jembiba khenyongi magizüktsü mapang lir ta onoki amanger. Virus ya Wuhan Institute of Virology nungi temai adok ta kuli teperi nung onoki amanger aser ibai September 12, 2019 matongdang ataloka liasü,” ta Republican osang ajanga ashi.

Wuhan Institute of Virology ya amenoker küm ana majungdang iba tesem nung lendong aketba jana anepaluba yimya asadanga tajungba kuma yanglushitsü atema 2019 küm July ita sen million $1.5 meshia liasü, ta report ajanga ashi.

Virus ya nisungi yangluba masü ta scientist temi ashiba nung ai-aora kateter, ta April ita US itdangiterba agency nungi lenir kati shia liasü.

US Tir Joe Biden-i May ita US itdangiter dang virus poktetba bushisüngdangba maparen nung tali temolung agütsüshia inyaker anogo 90 tsüngta osang agüjang, ta shia liasü.

Ajisüaka tang tashi US itdangiter temi virus ya shiruru nungi adok asü, mesüra Wuhan Institute of Virology nungi adokar tatem kati maruteter, ta osang ka ajanga ashi.