Corrs kentener telok tebu asüba ajanga lungjem

September 18, 2015: Irelang nung pop kentener telok, adianütemi taküm küm tetenzüklen tebu asüpila sentong nung lungjema ken kar tenloktsüba sülen teti asoshi lungjemtsü lemtetogo.

Jim Corr den tenu asem Andrea, Sharon aser Caroline nungeri ‘Runaway’ aser ‘Breathless’ ken atenba ajanga 2000 tetenzüklen kanga nüngtugu süa liasü saka 2006 nungi parnok melungjemtetti liasü. Joko parnok pilar küm 10 shi süiba mapang ka nung tebu, Gerry, taküm April ita nung asü.

Parnoki tebü asüba mapang külemi ken kar tenloktsüba sülen, ken dak parnok temulung anisüngzüktsü asoshi teti atema lungjemer ken atentsü mulungteta liasü.

Andrea Corr-i, “Onok meimsang, kübo iba lima nungi pilaba ajanga iba kensep tasenba adokdang onok temulung kanga raksaa liasü. Ajisüaka iba kensep nung aliba kentem ajanga taküm nung tasü tali itshidaktsür,” ta Britain osangkaket ‘The Sun’ dang ashi.

“Kübo asüpila sentong nung temulung kanga raksaogo saka onoki pa nem ken tenloktsüogo. Iba den külemi onok küm 10 tashi ken külemi meteni liasü saka tang onok ajurutepa ken tasen atentsü maongka anguba asoshi kanga pelar,” ta lai shisem.

Parnok indang kensep tasenba ‘White Light’ ya taküm November ita nung sayatsü aser 2016 küm ken tena jajatsü sentong lir.