Costa Rica nung tan mezüngsüa tanur ka Zika tashidak keter aso

San Jose, August 25 (Agencies) : Costa Rica nung tan mezüngsüa zika dak sentakba tashidak keter tanur ka soa lir. Iba tanur ya tekolak kangasa tila aser tekolok tangar tanur ama peria mali (microcephaly), ta Bodhbarnü linük health ministry sangdong ka ajanga metetdaktsü.
Iba tashidak ya belenoktsüba lir, kechiba süra tetsü ya Pacific Ocean aser Caribbean Sea na yongtsü nung aliba Nicaragua, Central America tesem nungi lir aser la dak zika virus ya linük nungsa mena asütsü, ta health ministry-i ashi.
Zika virus ya 2015 küm Brazil nung mezüng putet aser iba sülen America linüktemi prokshia ao. Iba virus ya mashisa alir tetsütem atema kanga lendong lir kechiyong zika virus yagi tanur teyanglupet ama sodatsür.
Brazil nungbo iba tashidak aketer tanur 1,800 tashi puteta lir.