Council of Nagalim Churches ajanga pelaba lemsateper

Dimapur, Yimpoksüi/Nov. 01 (TYO): Naga yimten ken o tatem kati arua angatetteptsü asoshi NSCN aser GOI na tsüngta maneni yimjung nung jembitsü tangatetba tajung kati aruba atema Tulusang Tsüngrem nem konang tetushi agütsür, ta Council of Nagalim Churches nung tongti zülur Ikato Chishi Swu ajanga sangdong ka nung ashi.
Mapang talangka nungi jembia aruba Naga-Indo yimten ken o tajungba nung renloktsü asoshi state aser bendang aina nung arogotem, sarasadem telok, lokti tentet balala, temulunger, kija kibongtemi tanen makai lumia sarasademba asoshi CNC ajanga pelar.
“Temeshipuri sarasademba aser inyakba nung tashi lir,” ta Yakob 5:16 nung shia aliba ama iba ken o jembishinüba nung terenlok aliba ya nenok tamang sarasadem ajanga lir. Iba ken o tatem kati maru tashi ken o jembirtem asoshi maneni sarasademjang ta onoki maneni mepeshir, ta kasa sangdong nung shia lir.
Asenok ajaki maneni Naga nunger tsüngta yimjung, telungjem aser tangatetep asoshi sarasademdi, aji asünung dang asenoki Khrista asoshi asen linük yanglutsü, ta CNC tongti zülurisa ashi.