Country ken atener Joey Feek arishi küm 40 nung süogo

Los Angeles, March 5, 2016 : Country ken atener Joey Feek arishi küm 40 nung cancer agi shiranga süogo.
Joey dak tzü aoba lenmang nung cancer adoka mapang talangka shiranga lia la aliba tesem Alexandria, Indiana nung lar kidang asü, ta femalefirst.co.uk ajanga metetdaktsü.
Joey asüba osang tejangja la den külemi ken atener aser la kinüngbo Rory Feek-i pa indang blogging account ajanga metetdaktsü.
Tena ya 2002 küm kibong aküm.
“Kübutsüi yongyaseta aser aginüa aliba mapang tanü atalokogo. La dang Kotak nung lir. Joko la dak cancer tashidak jungogo aser la nüktzü malur,” ta Rory-i pa indang blogging account ajanga lemsatep.
“Tang ya temulung zürepa nüktzü aika aluba mapang lir, iba den külemi ano tepela nüktzü aluba mapanga ka lir. Mapang tajung aika ajangshia aruogo aser ni itemji züngdanga lemsateptsü tenzüker,” ta paisa ashi.
Rory-i pa kinüngtsü cancer agi okrongba dena lemsatepogo.
“Joey ama okrongka kangshirtemi iba timtem tulu kara tembangdaktsünür. Parnok den mepilanüi bilemer ajisüka parnok timatemba tenük agi koda repranga meliteter. Anungji temulung agi maremtetaka parnok iba timtem tulu tembangdang salem ashitsü kanga pelar,” ta pai shisem.
Tena tanur Indiana ‘Down’s syndrome’ keter asoba sülen ita ishika dang lir külen June, 2014 nung Joey dak cancer tashidak puteta liasü.
Iba sülen 2015 küm October ita nung doctor temi Joey atema joko kecha teimla mali ta ashi.

You must be logged in to post a comment Login