Los Angeles, September 27 (Agencies): Country kentener tejen, Kenny Rogers küm 60 tashi ken tena kensep 76 adokba sülen joko ken atenba nungi anentsü metetdaktsüogo.
Arishi küm 77 tain, Rogers-i iba osang ya Deobar nü pa indang Khristmas kensep tasenba ajungketba mapang metetdaktsü. Pai, par jakrep jabaso ana den kinüngtsü den mapang peria endokner, ta ashiba Us magazine ajanga metetdaktsüogo.
“Tan alima sema kentena jajabaji ni asoshi tatembang asütsü. Joko küm aika iba lu nung liogo. Jangraba aser merumeruba na bendangtsü kanga tasak aser ni asangur asüdang ibaji ajangshiogo,” ta Rogers-i ashi.
“Ni kü kinüngtsü aser tanurtem anasa teti dang liner. Mapa agi ni parnok junga majuruteter,” ta pai shisem.
Tan pai “Once Again It’s Christmas” kensep adokba ya zünga joko pa meyong Khristmas kensep trokbuba asütsü.
Pai Niagara Falls, Ontario nung mezüng ser tan “Once Again Its Christmas” tour November 12 nü nungi tenzüktsü sentong lir.
You must be logged in to post a comment Login