Court-i dang CBI nem teteyuba agütsütettsü: Rajnath Singh

New Delhi, July 06 (Agencies): Madhya Pradesh Chief Minister Shivraj Singh Chouhan-i, Vyapam ochimashi ken o CBI nem bushisüngdangdaktsütsü asoshi court-i dang tetuyuba agütsütettsü ta jembiba o pusema Hombar nü Union Home Minister Rajnath Singh-i, iba ken o CBI nem bushidaktsütsü asoshi Madhya Pradesh High Court aser Supreme Court nati dang telemtetba agitettsü, ta shiogo.
“Vyapam dak sentakba ken o ajakji state sorkari ketdangsüa meinyaker saka High Court-i ketdangsüa inyaker. Iba ken o CBI nem bushidaktsütsü asoshi High Court-i dang telemtetba agitettsü. Yimtenren nung onok anemertemi ken o maliba onük ka agi ken o kümdaktsütsü meranger,” ta Home minister Singh-i ashi.
Iba ken o nung Madhya Pradesh Angh Ram Naresh Yadav densema aliba asoshi pa menden nungi aludaktsütsü benokba ka angadangtsü Supreme Court-i melungba sülen iba ken o ya CBI nem bushisüngdangdaktsütsü asoshi opposition temi Chief minister Chouhan dang rongshia arudagi.
Madhya Pradesh Vyavsayik Pareeksha Mandal (Vyapam) ochimashi ken o dak sentakba nung tang tashi nung nisung 45 mejangjaba kuli ajanga süogo.
Yashi state Chief minister-i, iba ken o ya Madhya Pradesh High Court-i ketdangsüa Special Investigation Team (SIT) ka nem bushisüngdangdaktsüdagi, iba dak alia CBI nem bushidaktsütsü asoshibo court-i dang lemtettsü, ta shia liasü.
“Ozü sorkar ya judiciary dang nungi temaba masü. CBI nem bushidaktsütsü asoshi High Court-i memelunger nung kodaser onoki tetuyuba agütsütettsü(?)” ta Chief Minister-i ashi.
“Supreme Court aser High Court nati iba ken o ya (CBI) agency nem bushisüngdangdaktsünüra parnok melung. Onok asoshi timtem kecha mali,” ta pai ashi.
Tesüiba anogo asem tsüngda nunga iba ken o dak sentakba nung nisung asem süogo.
Hombar nüa iba ken o dak sentakba nung tetsür police ka tasümang nguogo. Anamika Khuswaha jagi Sagar nung aliba ayong ka nung pongoka la sasa asü, ta osang ka ajanga ashi.
“Anamika Kushwaha (arishi küm 25) ayong nungji pongoka asü. Angashiba agi tesüiba anogo ishika la shisatsü kanga meinpronga liasü,” ta Sagar Police Academy nungi Savita Sohane-i ashi.
Yaküm Vyapam-i ketdangsüa agiba tatidang nung Kushwaha-i takok ngua liasü aser taküm February ita nung la academy nungji dena liasü.
La asüba dak sentakba nung osangbenertemi asüngdangba ka langzüdang Chief minister-i, tia maka tatalokba ya Vyapam ken o bushisüngdangba nung sentaka mali. “Nisung asüba shiaji (iba ken o den) mesentakteptsüla,” ta ashi.