Court-i Nirav Modi nem bail magutsü; police ket nung ayutsü

London/New Delhi, Metsüremi/March 20 (Agencies): Sen crore 13,500 dak sendakba PNB ochimashi ken o nung tongti aibelener ta tai tonglokja alisang, Nirav Modi yashi London nung Scotland Yard-i apu, aser tanü Westminster Magistrates’ Court-i pa nem bail magutsü.
Pa police ket nung ayutsü aser maneni March 29 nü ken o angadangtsü.
Modi-i iba ken o nung kuli agutsütsü atema court dang mapang meshiogo, ta osang angazüker.
London nung aliba Westminster Magistrates’ Court-i tuyuba nung ajemdaker Scotland Yard-i pa apuba sülen District Magistrate matsüngdangi anir oa pa anema ken o agutsü. Enforcement Directorate (ED)-i shidi ka ajanga pa India-i anir arutsü mepishiba nung ajemdaker pa puogo.
Yaküm PNB ochimashi ken o temai adokba sülen pai India toktsür ajen, iba sülen yaküm June ita nung Interpol-i pa anema Red Corner Notice agutsü. Ano külen Indian External Affairs Ministry-ia United Kingdom dang pa India-i anir arutsü atema mepishiogo.
India nung tongti bushisüngdangba agency, Enforcement Directorate den CBI-i PNB ochimashi ken o nung Modi aser pa den yaritepa inyaksang par kinünger Mehul Choksi na anema bushisüngdangdar. Choksi-ia yaküm India toktsür ajen aser tang Antigua nung jenoka lir ta osang angazüker.
CBI-i Modi, Choksi, Modi’er adianu aser kinüngtsü nunger anema FIR benokogo. Modi kinüngtsü Ami ya US senso aser par adianu Nishal ya Belgium senso lir.
Modi aser Choksi nati Letters of Undertakings (LoUs) aser Foreign Letters of Credit (FLCs) taila ajanga Punjab National Bank (PNB) ashioktsü ta tai tonglokja lir.