Court-i Smriti tazüngba degree EC aser DU dang meshir

New Delhi, November 20 (Agencies): Hokolbar nü New Delhi nung aliba court kati Election Commission (EC) aser Delhi University (DU) na dang Human Resource Department (HRD) Union Minister, Smriti Irani indang tazüngba record agüjang ta tuyuogo.

Election mapang nung Irani-i la tazüngba degree osang tai agüja lir ta ken o benoka lir.

Iba ken o benokba temepishiba agizüka Metropolitan Magistrate, Akash Jain-i EC aser DU ketdangsertem dang Irani indang tazüngba kuli agüjang ta tuyu.

“Iba temepishiba nung Election Commission aser Delhi University ketdangsertem dang item record meshitsü shia lir, aser ibaji melar,” ta court-i ashi.

Ajisüaka ken o agütsür Ahmer Khan-i CBSE dang Irani indang class 10 aser class 12 record meshitsü mepishibajibo magizük.

“CBSE dang class X aser class XII indang record meshitsü temepishibajibo magizüker, kechiyong ibaji tayongzükba kübok mali,” ta court-isa ashi.

Tamalen ken o agütsüsang jagi court nung, Irani-i election ketdangsertem nem agütsüba affidavit nung la tazüngba degree osang tai agüja lir, aser iba dak sentakba nung aiben ola adokaka telangzüba kecha magütsür, ta shia liasü.

Khan-isa, Irani-i Election Commission nem affidavit nung la tazüngba osang tai agütsü, aser ibaji IPC kübok ozüngtem aser Representation of the People Act (RPA) section 125A kübok temerenshi agütsütsüla, ta benoka liasü.

RPA kübok Section 125A ajanga affidavit tai agütsüba atema temerenshi mesüra ita trok tashi tepouktak ayutsü shia lir.

Irani-i 2004, 2011 aser 2014 küm Election Commission nem affidavit nung osang tai agüja lir ta Khan-i benokbaji June 24 nü court-i agizüka liasü.

Khan-isa, Irani-i April 2004 Lok Sabha election mapang la affidavit nung la 1996 küm DU (School of Correspondence) nungi BA renem ta shia lir, July 11, 2011 nü Gujarat nungi Rajya Sabha election atema lai la tazüngba degree temabaji School of Correspondence, DU nungi B.Com Part I lir ta osang tai agüja lir, ta benok.

Iba dak alia 2014 küm April 16 nü Lok Sabha election nung Uttar Pradesh, Amethi constituency nungi tokteptsü atema Irani-i la School of Open Learning, DU nungi Bachelor of Commerce Part-I renem ta affidavit nung shia lir, ta Khan-isa benoka lir.