Court-i temeden agüjaka Pakistan nung Khristantsürla nüji mangur

Islamabad, Aenjeti/Jan. 21 (Agencies): Pakistan nung Khristantsür Aasia Bibi, shiba tamangba yimsü mezüngmeshiba ken o nung temeden ngur ita asem tajunger lir, la ya tang tashi tsüngden chiokdak alir taküm ka ama alir. La nem tasüba temerenshi agüja liasü, saka court kati la nem temeden agütsü aser la tia asoshi tatembang ken o jembitsü ataa lir.
La nem tasüba temerenshi agüjang ta akhangertemi la dak tenük yoktsü ta tetsübu agi la azüngmeyakdak tesem nung yua lir. La yua aliba tesem nungi lai lar tanurtem menungrar, shirnok lendong nungi taküm kümzüktsü mechi Canada nung anir oa yua lir.
Pakistan sepaitemi arishi küm 54 tain Bibu ya anüker aser la miima yua aliba tesem nung kichiba dena melabokdaktsür aser kimai meyoker, ta lar medemer kati ashi.
Kasa mapang Islam yimsü akhanga amangertemi la ken o atema petition ka agütsüba Supreme Court ajanga asadanger aser right-wing tamangba yimsü nung amendaka aliba telok balalai la medentsüba aitsür aser la nem tasüba temerenshi agüjang ta akhanger.
La indang ken o ya Pakistan nung kangadang mangatettep akaba temzüng, tamangba yimsü mezüngmeshiba (blasphemy) lir aser iba temzüng ajanga Pakistan nung tamangba yimsü tsütsü kin tilatem rongnung Shiite Muslim tem dena tim atemer. Islam yimsü mezüngmeshiba ken o nung aitsür nem tasüba temerenshi agütsür.
Court-i temeden agüjaka iba temzüng kübok tai tongloktsüba kisüng nung mang ayanger. Provincial governor ka shibai Bibi busema nokdak, pa khaset aser kasaji government minority minister shibai iba tamangba yimsü mezüngmeshiba ozüng anema jembi, pa taküm sama.
Bibi indang ken o ya 2009 küm tenzük, kong Muslim tsür ana alo nung Khristantsürla ajemba marok nungi tzü ajemtsü memulung. Parnoki la Islam yimsü dangi meyipang ta takhangba agütsü saka lai memulung. Iba sülen anogo pongu lir lai tamangba yimsü mezüngmeshi, ta nisung telok kati tai tongloktsü.
Prophet Muhammad mezüngmeshi ta aija 2010 küm la nem tasüba temerenshi agütsü. La nem tasüba temerenshi agütsür küm ti tashi atsütepa aruba sülen Supreme Court-i Mongputeni/October 31 nung la medentsü.
Iba mapang la okatsür Saif-ul Malook, shiba tangbo tetsübu agi tanga linük nung jenoka lir, pai ashiba agi, la dak tai tongloktsür temi kuli agütsüba ajak balala lir, ta nokdaka liasü. Bibi-ibo la tai mali ta teti nokdaka arur.
Saka la nem temeden agütsüba ajanga linük tesem ajungalen Tehreek-e-Labbaik party-i anir longkak ait. Iba telok atema nükjidong ka dang lir aser ibaji prophet kümzüka ayutsü ya lir. Iba party lennir Khadim Hussein Rizvi aser Mohammad Afsal Qadri na tepuokdak yua lir. Tena yagi azüdokshitsüsa tasa yanglu, Bibi ya yimjak nung süngzü agi alensettsüla aser la medentsür obendanger asem nem tasüba temerenshi agütsütsüla, ta akhang.
Parnoki tashi tait sepaitem rongnung rara tenzüktsü ajungmeso aser Ato Kilonser Imran Khan’er sorkar tasenba atsüngdoktsü merang.
Islam yimsü akhanga amangertemi Bibi tepsettsü akhangba ola tuluba aküm aser Khan’er sorkari Bibi nem temeden agütsüba ya Supreme Court-i tanaben mereprangshi tashi la Pakistan nungi meyoktsü ta nangzük.
Bibi tang miim tesem nung yua alidak nungi Pakistan sepaitemi la den interview magidaktsür. Lar medemer aser kinunger kari la den ajurutepa lir saka parnokia tetsübu agi osangbener dang jembitsü memulunger.
Lar medemer kati ashiba agi, Bibi kinungbo Ashiq Masih shiba Bibi nem tasüba temerenshi agüjang ta akhangba mapang longkak aiter temi injang khalokja yirutsü, pa Aasia Bibi den lir. tena tanur ana, Eisham (20) aser Esha (19) ya Pakistan nungi anir ogo.
Bibi atsüka aliba tesem ya tesadem saka jail amai dang lir aser lai künü anogo lar kibong longjemtsü imlar, ta Bibi’er medemer kati ashi.
Saka Bibi nem temeden agüja aliba ya kodang reprangshitsüar memetet.
Supreme Court Chief Justice Saqib Nisar mapa metoktsüdang iba ken o ya tembangdaktsünür, ta Bibi’er medemeri ashi. Züngsem asem agi akümba panel ajanga Bibi medentsür rongnung Nisar aser pa melentsü alisang, Asif Saeed Khan Khosa na dena liasü. Parnoki temeden agütsütsü lemtetba obendangba kaket tapak 52 nung shia aliba agi, Pakistan linük temzüng aser Islam nunger temeshi kaket, Quran nung temeden agütsütsü/tai adoktsü shia lir.
Malook-i United States nungi The Associated Press dang phone ajanga ashiba agi, iba ken o tanaben jembishitsü asoshi petition agüja aliba ya magizüktsü ta pa temulung lemteta lir. Saka court-i obendang agütsütsü memulungra ita sa ita aser küm sa küm agitsü akok, ta pai ashi.
Saka attorney Ghulam Mustafa Chaudhry-ibo Bibi nem temeden agüja aliba ya agientsü akok, ta shiogo.