COVID-19 agi menepa alir temai adoktsür merenshitsü

Dimapur, Rongchii/April 01 (TYO): Epidemic Disease Act 1897 kübok Nagaland Epidemic Disease (COVID-19) Regulations, 2020 indang Clause No. 13 nung tashi agüja aliba amshia, ketdangser nungi temelaba magie kija/reju/lokti tentet shingaia COVID-19 dak sendakba osang kecha print mesüra electronic media nung amshitsü memelar, ta sangdong ka ajanga metetdaktsü.
Tang COVID-19 tashidak wara agi alima ajunga ayimsünger aliba mapang iba tashidak agi kongshir alir mesüra alitsü südi ta temulung melemi alirtem osang temai adokja social media nung prokshiba ajanga temolung yirutsüba aser khuret tali agütsüba nguogo.
Anungji Nagaland Epidemic Disease (COVID-19) Regulations, 2020 (Clause 21) nung ajemdaker, print aser electronic media balala nung COVID-19 agi kongshir aliba nisungtem indang bio-data mesüra noksatem shibai temai adokdaktsüdir Section 188 of Indian Penal Code 1860 (45 of 1860) kübok merenshitsü, ta sangdong ajanga ashi.