Covid-19 ajanga tekolok nung timtem adokdaktsür

New Delhi, July 11 (Agencies): Alima nung novel coronavirus wara adokba sülen ita trok süia arudang iba virus dak tekolok nung timtem agütsütsü tashi lir ta neurologist temi bushitetba osang ka metetdaktsüogo.
COVID-19 ajanga temang nung tango sashiba shilemtem, talisa tepokpok aser nisung kar dak temulungjang nung kongshir ta tesüiba mapang bushiteta liasü.
Ajisüaka, tawa kuli tasentem anguba nung Covid-19 agi shirangertem dak tekolok nung timtem adokba shia lir. Covid-19 agi shirangdang aser anepaludang, virus agi nisung kar dak tekolok nung kongshiba bushitetogo.
Lancet Neurology-i tawa bushitetba osang ka lemsatepba nung, Covid-19 agi shiranger aika puteta aliba linüktem nung nisungtem tekolok nung timtem anguba shia lir.
Talisa China, Italy aser United States linüktem nung Covid-19 puteta alir nisung 1,000 jungnüa dak tekolok, tongtiret aser tezü nung timtem adoka kangshir, ta Lancet Neurology-i metetdaktsü.
Ajisüaka, India nungbo iba indang kuliji ano mengutet lir. “Covid-19 agi shiranger kar dak tekolok nung kongshitsü akok. Onoki iba khuretji ajitetogo saka ano kuli tejangja mengutet lir” ta All India Institute of Medical Sciences (AIIMS) Director, Dr Randeep Guleria-i metetdaktsü.