COVID-19 anema longjemer raratsüla: Temjen Toy

Dimapur, April 14 (TYO): Nagaland dena alima ajunga ayimsünga prokshiba wara COVID-19 anema inyakba mapa nung nisung ajaki tangatetba tajung nung yariteptsü mepishir, ta Mongulbarnü Nagaland Chief Secretary, Temjen Toy-i metetdaktsüogo.
“Nagaland sorkari iba wara azüoktsü atema akokba tashi mapa inyaker, saka tashidak tasen ka asünung, asenokia tangar ama iba tashidak azüoktsü aser noktangtsü atema koma raratsü aser kechi inyaktsü ta asüba lenmangtem bushia inyaka arur” ta Chief Secretary-isa ashi.
“Sorkar aser iba rara nung sendaktepa alirtemi inyakba nung metokmeperiba mesüra aibelena inyakbatem lir, saka onoki anogoshia angazüka tajungba inyaktsü meranger. Tanü iba tensa ajuruba ajanga asen health delivery system jenjang majungba tali angatetdaktsüogo aser iba jagi sorkari tekaratiba nung jenjang tajungba kümdaktsütsü atema meranger” ta Temjen Toy-isa shisem.
Mongulbarnü Chief Secretary indang War Room on Covid-19 tentetogo aser iba nung information system kanga junga sendakteptsü aser state ajunga nung Covid-19 maparen atema telemtetbatem agitsü. Anungji nübortemi tebilemba tajungtem temjentoy.gov.in nung yoktsü ayongzüker, ta paisa metetdaktsü.
Tanü Chief Minister, Neiphiu Rio menden ser minister aser advisor tem senden ka menogo aser idangji district balala nung nüngdakbatem aser teinyaktsü onüktem benoka lemsatepogo, ta Chief Secretary-isa metetdaktsü.
COVID-19 anema rara ya nübortem rara ka lir aser iba nung civil society tem dena lir. Iba jagi Deputy Commissioner tem dang District Task Force tentetba nung tribal hoho züngsem anana dendaktsütsü atema tetuyuba agütsüogo, ta Temjen Toy-isa ashi.