COVID-19 anema raraba nung lokti aikati shilem tajung agir

DDSC Stadium Dimapur nung April 01, 2020 nü makamaiter aser nüngdakbapur nem lokti tentet balalai teyari agütsüba noksa nung angur.

Dimapur, Rongchii/April 01 (TYO): Coronavirus, koba dang COVID-19 ta ajar, iba tashidak wara ya alima nung tashidak wara tamajungtiba rongnung ka ta züngshir. Alima ajunga nung iba tashidak wara agi sünger aliba mapang lokti tentet balalai sorkar den yariteptsü ya nüngdakba mapang tongtibang ka kümogo. Nagaland nunga lokti tentet balala, NGO, arogo, kija, linük tenzüker aser yimten yimsüsürtemi COVID-19 den raraba mapang teyari aser tenla balala agütsüba ngua temulung nung kongshir, ta DPRO Dimapur sangdong ka ajanga metetdaktsü.
Dimapur nunga tesem ka nungi tesem ka nung oa mapa inyaker, makamaiter aser teyari nüngdaka alirtem den külemi linük ajunga shibangba ajanga nisung aika kongshir district administration aser police ketdangsüba kübok tesem balala nung anidena lir.
Item tesemtem nungnung Netaji Railway Colony nung aliba Youth Hostel ya ka lir, kong kaketshir timba sür nisung 42 (tetsür 18 aser tebur 24) shirnok Kerala, Maharashtra aser Goa amala tesemtem nungi aruba lir, parnokya Youth Hostel Dimapur nung quarantine süa lir.
Jain Samaj Dimapur ajanga item kaketshir nem anogoshi chiyongtsü, tzü aser süngjanglijang agütsür aser kasa mapang Bihari Samaj ajanga nüngdakba osettem, talisa ration, hygienic aids tem agütsür. Iba lokti tentet ana yagi parnok nem April 24, 2020 tashi teyari agütsütsü, ta DPRO Dimapur dang ashi.
Athletics Coach B.Awala Walking, shiba Youth Hostel Dimapur nungya warden ka ama inyaker, lai ashiba agi, tangartem daka alaka Lotha Church Chumukedima ajanga hygiene aids aser surf agütsü, Konyak Students’ Union ajanga amtsük-amsang den tzü agütsü. Yasüng nisung tasen ana arusemba ajanga Youth hostel nung nisung 44 kümogo, ta lai ashi.
Yimtong nung nüngdak makaba nung olioraba anendaktsütsü mechi aser lokti tentet balalai yimya tajungtiba nung teyari balala agütsütettsü mechi Dimapur district administration aser police temi meshimetsür, ki malirtem, makamaiter aser anogoshi aayangertem DDSC Stadium, Dimapur nung March 31, 2020 nü aniden. Yangji alirtem nem lokti tentet balala aser NGO temi chiyongtsü aser nüngdakba osettsüsettem agütsür.
Kasa mapang Dimapur Bonks temi molungsoa aser anibelem mesasai chiyongtsü agütsür aser nüburtem nem lokti nungi pila alitsü shisatsü agütsür.
Maneni Swami Vivekananda Welfare Foundation (VWF) ajanga state tesem ajunga shibanga aliba mapang tepiyong nüngdakba pur nem chiyongtsü agütsütsü mulungteter inyaker. Nisung telok telok nungi pilaa alitsü tangatetba nung VWF pur nisung pongu-ngu telok asem lemsar kari jang-o-tzü alir, kari sorochioker aser kari chiyongtsü lema agütsüba mapa inyaker. VWF purisa jila nung survey agia tesem lemsar chiyongtsü manguba nübirtem nem parnok nüngdakba jang-o-tzü agütsütsü sentong lir.
Chiyongtsütem ya Railway Pandal nung asor, kong timtem nung alir nem chiyongtsü agütsütsü renemtsü asoshi railway ketdangsertemi VWF nem common kitchen amshitsü temelaba agütsü.
Muslin community, Bengali Samaj, Marwari Samaj, Bengali Students Youth Generation, Bhojpuri Samaj, Durgabari Committee, Rotary Club Dimapur, Lions Club Dimapur densema lokti tentet balala aser NGO aikati makamaiter aser nüngdakbapur, quarantine nung alirtem yarir aser police/traffic duty inyaker, ta DPRO Dimapur ajanga ashi.
State machinery ajungai arrsanga inyakba mapang lokti tentet balalai shilem tajung agia amalitep akaba ajanga Nagaland nung COVID-19 tongpang akoktsüsa, ta sangdong ajanga ashi.