Covid-19 atema Special Action Group senden amen

Dimapur, March 18 (TYO): Bodbarnü Nagaland nung Covid-19 atema Special Action Group (SAG) senden ka menogo.
Iba senden ya Home Commissioner, Abhijit Sinha IAS menden ser amen aser Department of Health and Family Welfare Principal Director, Dr. Vizolie Suokhrie-i department-i mapa inyaka aruba osang metetdaktsü.
State Police Force indang training tenzükogo aser tekaratiba nung screening maparen tenzüktsü. Department-isa state nüngdakba ama Ventilators aser Personal Protection Equipments (N-95 masks & scanners) talila bener aruogo, ta Dr. Vizolie-i ashi.
Home Commissioner Abhijit Sinha-i H&FW department dang Dimapur airport-i arurtem osang tejangja bendentsü atema tetuyuba agütsü.
Nagaland-i gari lenmang ajanga aruba entry points 11 lir aser iba atema Deputy Commissioner tem dang tekaraba nung screening maparen tenzüktsü tuyuogo, ta paisa ashi.
Dimapur Task Force-i Railway Authorities den yaritepa, Dimapur Railway Station nung exit point ka dang kümdaktsüogo aser iba ajanga passenger tem screening sütettsü, ta Home Commissioner-isa shisem.
Paisa Deputy Commissioner tem dang Village Councils, ward ketdangsertem aser Kin Hoho temi March 1, 2020 nungi tangar aruba osang sangoktsütsü atema mapa inyaktsü tuyu.
Nagaland-i aruba bendanger tourist 49 ji jungjunga reprangdar, ta Home Commissioner-isa shisem.
Senden nung Department of Rural Development kübok Rural Livelihood Mission-ia oshi ajak nung Covid-19 indang osang meyipzüker prokshitsü ta ashi.
Iba mapa ya H&FW den yaritepa inyaktsü, ta parnokisa shisem.
Külen, State Disaster Management Authority-ia local print media nung COVID-19 indang osang prokshitsü.
Kohima nung tamangba yimsü teloktem den senden amentsü
Home Commissioner, Abhijit Sinha-i March 19, 2020 nü Kohima nung aliba tamangba yimsü balala indang teloktem den senden ka amentsü jatepogo.
Sendenji anepdang 10.30 ako nung Nagaland Civil Secretariat Kohima nung pa indang office chamber nung amentsü, ta Home Commissioner-i metetdaktsü.
“Mapang maliba ajanga iba shidi telok ajak dangi meyoktet, saka iba sangdong yagi peridaktsür. Anungji Kohima nung aliba tamangba yimsü dak sendakba telok ajak iba senden nung adentsü mepishir,” ta Abhijit Sinha-i ashi.