Covid-19 azüoktsü atema senden amen

Dimapur, March 24 (TYO): Nagaland Deputy Chief Minister Y Patton den Principal Secretary & Commissioner, Nagaland, Home Commissioner, DGP Nagaland, Special Secretary (Home), Secretary Health & Family Welfare, ADG (Admn), ADG (Law & Order) aser SP Kohima nungertem Corona virus (Covid-19) atema senden ka amen.
“Tang ya asenok health khuret tulutiba ajurua lir. Prime minister Narendra Modi-i ‘Janta curfew’ ayongzükba kanga takok ngua agiogo aser linük balalai iba mapa tajung atema tenüngsang agütsüogo” ta Y. Patton-i ashi.
“Nagaland nung alirtemi iba tetsübutsü virus anema mapa balala inyaktsü ayongzükba sülen anidakba atema pelar. Health & Family Welfare department den Home aser tanga department temi senso ajak kümzüka ayutsü atema tanen makai inyakdar” ta Home Minister-isa ashi.
Y Patton-isa District Administration aser talisa state balala den arrtsüa aliba district tem dang taoba mapang tuyuba ama arrtsü jungjunga shibangtsü tetuyuba agütsü.
Paisa civil society tem, NGOs, arogotem aser kaketshirtem dang state sorkari lateta aliba inyakyimtem nungita yariteptsü ayongzük.
Dy. CM-isa DGP dang police unit ajak kümküma atatsü aser akokba tashi yariteptsü renema alitsü tetuyuba agütsü.