COVID-19 dak sendakba nung Kohima DTF senden amen

Dimapur, Metsüremi/March 12 (TYO): Corona virus (COVID-19) atema tentetba Kohima District Task Force (DTF) indang senden ka tanü March 12 nü Deputy Commissioner Office Chamber, Kohima nung menogo. Iba senden ya DC Kohima, Gregory Thejawelie NCS lenisüba kübok agi.
Iba ken o dak sendakba nung district renemshia ataba indang asadangba mapang DC Kohima-i, Kohima district kübok January 28 nü nungi tenzüka tanü tashi Naga, domestic aser bendanger senzüsenpongertem COVID-19 tashidak prokshia aliba linüktem nungi Kohima-i arurtem asadanga aruba metetdaktsü. Paisa, tetuyuba sülen anidaka district Surveillance Team-i senzüsenpongertem kanga junga asadanga arudar aser parnok dang anogo 14 nü tashi kidang nungi madoki alitsü aser anogo 28 tashi asadanga alitsü tuyuogo, koba parnok timba kati tembanga inyakogo aser tanü tashi nung tashidak menar alitsü ta temulung melemi bilemba nisung ka danga mali, ta ashi
Ajisüaka linüktem nung tashidak menar aser tashidak agi asürtem asüba ajungbena aika akümba sülen senden nung district renemshia alitsü asoshi aser tang district nung surgical masks aser hand sanitizer agi anünga akümba indang mapang talanga sensaksemogo.
Senden nung item jenjangtem agitsü asoshi lemteta liasü; District semdangaba domestic aser bendanger raliwalirtem nem tenokdangba agütsütsü, iba timtem dak sendaka aliba department-i tenüngdakba facility ajak keter Isolation wards renemtsü; department-isa surgical masks aser hand sanitizer agi anüngba tebilemtsü bentettsü aser iba dak sendaka aliba agencies tem den jenjang indang jembishinütsü; Isolation Ward atema shima aliba mozüki; Naga Hospital Authority Kohima (NHAK), Chedema Ayush Hospital, Jakhama Hospital aser TB Hospital Khuzama semdanga facilities tem asadangtsü aser hand hygeine dak sendakba nung ministry of health and family welfare aser WHO tetuyuba, All India Radio Kohima aser tanga print aser electronic media ajanga tangazükba agütsütsü asoshi telemtetba agiogo.