COVID-19 Lockdown mapang Naga lima nungi Bendanglen Oa Alirtem Tebilemtsü Kar

– Dr. Imkongmeren, New Delhi.

Alima ajunga Covid-19 wara süngmang tulu agi meketbanger, meyisa meyi, tulu tila mebendang menatepa aodang, akidang metongdakra atalokba ama remoka südaki. Corona mesen tali tali poklokba nungi jenbutsü merangdang anema alirtema kidang monga anembongteper. Linük jenti nung Aotsür Aortem prokshia lir, Tsüngremi tanü tashi kümzüka Corona Virus agi atongba, asüba osang kecha mali. India lima Covid-19 osangtem reprangdangra, Delhi-NCR nung nisung 2523 tema, containment zones 87, Mumbai nung talisa 4447 tema, Containment zones 813, ano kiyongtem aika longzüka shibangyonga odar. Naga nunger, Aor Aotsür jenti item city-tem aser tesemtem nung litepdaki. Covid-19 wara lockdown tenjidang, aoksaa jongtak ajuruba tebilemtsü khuret rongnung, rongdak asem ajitetba – chiyongtsü, talidak aser temang anema aliba (health) angur. Iba ocet ya Delhi & NCR nung asen nüburtemi ajuruba dak ajemdaker zulur.
Delhi & NCR nung Aor Lokti tentet asem lir. Delhi Ao Senso Telongjem (DAST), Delhi Ao Baptist Church (DABC) aser Delhi Ao Kaketshir Telongjem (DAKT). Iba nung Aor Aotsür züngzem lir, item loktitem nung züngsem malirtem jenti lir. Iba Covid-19 wara mapang telok aser kija kibongtem teka amteper meranga yariteperdar. Delhi-NCR nung Aor kibongtem reprangdangra 78 tema, anükapang kibong 74 tema lir, aser lanurtem mapa inyaker 500 tema, students aser training balala agirtem aser mapa bushirtem 350 tema lir. Lanurtem Covid-19 lockdown mapang “unorganized sector” aser hospitality nung inyakertem 300 dak tema ajungbena mapa nungi anenadokba agi, aoksa tebilemtsü, terokrong tia ajurur. Delhi Ao Senso Telongjem-i pei nebur khuret angateta, mapa nungi anenertem, ainlen jajartem, shirangertem aser kaketshirtem kechi tia nung ali tejanga kuli bendener, Government dangi DRC Nagaland House, New Delhi ajanga teyari meshia zülüogo. Chief Minister ajanga lapokba “iamstranded.nagaland.gov.in” website ajanga teyari angutsü atema aikati form submit süogo. Tribal Unit-temi agütsüba tenüng den metemdanga ajidanger külen senji parnok account nung enoktsütsü ta DRC nungi metetdaktsü. Anungji, parnok tenüng, yimtsüng, mobile number, kechi inyaka liasü, kodang mapa nungi anen aser address tejangja nisung 300 indang mezüng list nung DRC office tongtsü. Ano tanübuba list nung aika yokogo. Nagaland Government nungi teyari angütsü tenzükogo, saka tesasatsükaji pei tenüng nung Bank account malirtem, Adhar Card malirtem, unorganised sector nung inyaker identity card malirtem, mobile mali/raksar/balance maliba ajanga shinga tena tongtepratep mesüteti alirtemi iba teyari magitetsüsa angur. Ano ajemma bilemba kaji, CM assistance link nung tenüng, Adhaar card, Bank Account agütsüba data-ji leaked asüba list nung pie dena angudangbo, kanga temulong korema, Covid-19 wara tongpang den pei temeten ajak tema nung utaka angudang, lanurtem aika tezü tangtepba, nemnemtepba angashir, social media-tem nung ajaki ngudar. Karibo yamala teyarijiang kecha magili ta kümli atoker.
Tang tashibo Delhi Ao Senso Telongjem aser Delhi Ao Kaketshir Telongjem office dangibo senotsü teyari Government nungi arubabo mali. DAST ajanga shiranger, koda masür tejangja kuli alirtem nem tensa nüngdak den apet teyari agütsüdar. Delhi Ao Baptist Church (DABC) ajanga temeim tulu lemsatepa chiyongtsü & nungdakbatem (ration, tzü, LPG Gas, etc.,) nüngdaka alirtem nem anogoshia kiyong ajak ayimjema parnok talidak ki tonga oa agütsüdar, tang tashi nung nisung 300 tema nem tongtsüogo.
Jokoerla, Corona Virus tongpang tesashiba akümdang, tsümetsünghet atanger ama kümogo. Kar dak alaka asen nüburtem rent nung liteper, aika rent meshir magütsütet koda masü tia lir, kar pei mapa inyakdak alirtem mapa nungi anenli pei talidak nungi aritokba, karbo ita ishika shiranga mapai mao, kar mapa ngur anogo ishika, karbo ano mapa mangudang lockdown tenzükba purtem jenti ayako tendar. Delhi Government-i ki atema rent reprangtsü nangzüka lir, saka tebilemtsü kaji karbo ki rent ita 2-3 magütsütet teimtem nung lia lockdown ajuruba, Delhi telongtet nungbo yaküm nungi tzü aser light bills kanga tajemba yanglushir ishi shi dang aruaka, sen makar atemabo temela masü, Ano NCR (Noida, Gurgaon, Faridabad, Gaziabad) nungbo yamaji mali.
AKM office ajanga 23-4-2020 nung Mokochung District nungi oaa bendangli alir Nation Wide kaketshirtem aser mapa balala nung inyaker lockdown ajanga bendanglen nungi pie limai maruteti alirtem kaketshir telen ajak nungi tenüng, contact number bendentsü sangtongogo. Lockdown lapokli aika asen limai arutsü renema lir, city balala nungi Nagaland-i aika arudoktsü sudi. Anogo 14 nungi 20 tashi quarantine tesem nung alitsü meteter dang shilangtsü. Nagaland nung quarantine facilities, District Hospital aser Community Health Center aika nung shiranger anepalutettsüsa PPE, Testing Kit, Ventilator, aser Doctor & Nurse-tem Covid-19 tashidak den raratetsüsa aruatena renemtepa osang angashir.
Pei limai moteti anungzüka alirtem atema yaritsü tebilemtsü lir, lokti balala aser kija kibongtemi külem khuret ama bilemdaktsüner. Tsüngremi dang kechi tia arutsüar metet, lockdown mapang tia makai Aotsür Aor kar dak südok madok ka atalok nunga Union aser Arogo teyari ajanga aki ama bendangli tanglang nungi temang pei tetsü taso lima tongtsütsü kanga tasak asütsü.Corona wara tongpang tesashi akoktsü atema telongjem nung pei taso lima alir aser bengdanglen alir ajaki teka amteper noktakdi.

(Delhi-NCR temeket nung Aotsür Aortem kar danga teimtem ajuruba lira Delhi Ao Senso Telongjem ketdangpurtem den tongteprateptsü akok. President- Er. N.Ajungba Jamir Mob no:+91-9868393249; aser General Secretary-
Dr. Imkongmeren, Mob. No: +91-9811500762).