COVID-19 Nagaland App tasen ka sayaogo

Dimapur, Rongchii/April 9 (TYO): Self Declaration nCOVID_19 Nagaland App version tasen ka Nagaland sorkari sayaogo, koba hhps:/nagahealth.nagaland.gov.in nungi download sütettsü.
Sorkari health ketdangsertem dang, nisung ka home quarantine asütsü asoshi sangdongba mapang iba nisungba mobile phone nung ‘Self Declaration COVID-19 Nagaland App’ download südaktsütsü aser registration inyakyim ajak tembanga inyakdaktsütsü asoshi tuyuogo.
Nüburtem shirnoksa home quarantine asütsü tuyuogo parnoki parnok indang mobile phone nung self declaration app download süa registration inyakyim ajak tembanga inyaktsü aser smartphone indang GPS facility lapoktsüla. Maneni pa/la home quarantine mapang madem tashi mobile phone meshibangtsüla aser GPS lapoka dang ayutsüla.
Shirnok ket nung smartphone mali parnoki ASHA/ANM/School tesayurtem mesera smartphone alir mashi ka teyari agia Community Reporting ajanga tashidak keta aliba temaitsü lira peisasa osang agütsütsüla. Nisung ajaki iba App nung home quarantine tab amshia pei health jenjang metetdaktsütsüla, control room/surveillance team nungi call aruba agizüktsüla, parnok ki semdangba mapang surveillance team den teka amteper inyaktsüla aser DHFW/COVID-19/2019-20/689/97 dt. 21st March 2020 nü sangdongba Home Quarantine tetuyuba shidak benshitsüla.
Principal Director, Health &Family Welfare-i sangdong ka ajanga, iba tetuyuba sülen manidakertem ajak ozüng alema inyaker kaka ama züngshitsü aser Epidemic Disease Act, 1897 dak ajemdaker temerenshi agütsütsü, ta metetdaktsü.