COVID-19: Nagaland nung nisung 100 taneptsü nguogo

Kohima, June 16 (TYO): Nagaland nung Mongulbarnü nisung ana dak COVID-19 putetogo aser tena züngsema nisung ajak agi 179 kümogo.
“Sample 316 tendangba nungi nisung ana dak COVID-19 putetogo. Tenaprong Kohima Quarantine Centre nungi lir” ta Health & Family Welfare Minister, S Pangnyu Phom-i metetdaktsü.
Nagaland nung nisung 100 tashi taneptsü nguogo aser 87 tang anepaludar, ta Pangnyu-isa ashi.
Nagaland nung COVID-19 puteta aliba district telemsaji: Dimapur – 126, Kohima – 31, Mon – 9, Tuensang – 5 aser Peren district – 8 lir.
Taneptsü angurtemji Dimapur nung nisung 79, Kohima nung 8 aser Tuensang nung 5 lir.
Nagaland nung temulung melemi bilemba sample 7000 dak tema tendangogo aser sample 6500 den teimba laboratory nung tendanga liasü, ta Health & Family Welfare Department-i metetdaktsü.
TrueNat machine test ajanga sample 470 shi tendangba nung ajak negative putetogo. Tang tashi nung sample 300 indang osang ano mangu lir, ta parnokisa ashi.
Tanü Chief Minister Neiphiu Rio-ia ashiba agi, Nagaland nung testing facility maliasü saka tangbo anogoshia sample 600 tashi tendangteter.
Naga Hospital Authority Kohima nung BSL-3 lab aser district balala nung TrueNat machine 20 ajanga tendanger, ta Rio-i metetdaktsü.
Dimapur nung BSL-2 lab lapokba aser TrueNat machine talila amenokba sülen Nagaland nung sample tang dang nungi anasü agi teimba tendangtettsü, ta paisa shisem.
Tanü Prime Minister Narendra Modi-i State aser Union Territory 21 nungi Chief Minister, Lieutenant Governor aser Administrator tem den video conferencing ajanga senden ka menogo.
Iba senden nung Nagaland Chief Minister den Deputy Chief Minister, Health & Family Welfare Minister, Planning & Coordination, Land Revenue & Parliamentary Affairs Minister aser Information Technology, Science & Technology and New and Renewable Energy Advisor nungertem aden.
Tanü tashi nung sample 6,987 tendangba nungi sample 5,582 osang nguogo aser sample 1,405 osang ano mangu lir.
Kohima nung aliba BSL-3 lab nung sample 3,607 tendangba nungi sample 135 positive ta putetogo.