COVID-19: Nagaland nung nisung 193 nungi 103 taneptsü nguogo

Kolkata nungi Indigo tayimtsü nung arurtem agiba noksa angur. (Dimapur, June 17, 2020 : DPRO Dimapur)

Kohima, June 17 (TYO): Nagaland nung Bodbarnü nisung 14 dak COVID-19 putetba ajanga nisung ajak agi 193 kümogo.
COVID-19 puteta alirtem rongnung parnok 103-i taneptsü nguogo aser tang nisung 90 CIVID hospital balala nung anepaludar.  Tanü Health & Family Welfare Minister, S Pangnyu Phom-i Twitter nung nisung 14 dak COVID-19 putetba osang metetdaktsü.
Tanü mezüng osang metetdaktsüdang, sample 314 tendangba nungi Dimapur Quarantine Centre aser Tuensang Quarantine Centre nungi nisung kaka dak COVID-19 putetogo ta Minister Pangnyu-i ashi.
Tanü nikongtsütsü ano pai tanga osang ka nung “Sample 238 tendangba nungi nisung 12 dak COVID-19 putetogo. Parnok ajak ya Mon quarantine centre nungi lir” ta Pangnyu-isa ashi.
Tanü putetba sülen Nagaland nung COVID-19 puteta aliba district telemsa:
Dimapur nung 127, Kohima nung 31, Mon nung 21, Peren nung 8 aser Tuensang nung 6.
Tang tashi tanüngba district 6 nung COVID-19 putetba osang mali.
Tanü tashi Nagaland nung sample 7202 tashi tendangba nungi sample 6174 indang osang nguogo aser sample 1028 indang osang ano mangu lir, ta Principal Secretary Home-i metetdaktsü.
Sample 7202 nungi 4569 tashi Naga Hospital Authority Kohima (NHAK) nung aliba BSL-3 lab nung tendangtsü agütsü aser tanü tashi nung sample 3910 tendangogo, ta paisa ashi.
Maneni, Nagaland nung nisung 7883 tashi Facility Quarantine nung lir.
June 17 nü nisung 280 aruogo:
June 17, 2020 nü tangalen nungi nisung 280 tashi Dimapur tonga aruogo.
Bodbarnü Air India tayimtsütem ajanga Kolkata nungi nisung 130, Guwahati nungi 30 aser Imphal nungi 37 aru. Ano, Indigo flight ka ajanga Kolkata nungi nisung 83 aru.
Tayimtsü balala nung arurtem rongnung Kohima-i aotsüpur ajak screening asüba sülen yok aser tanüngba nisungtem Agri expo-i anir ao aser idak nungjagi quarantine centre balalai yok.