COVID-19 nungi matambensartem kümzüka ayutsüla

Dimapur, Metsüremi/March 28, 2020 (TYO): Alima tesem ajunga nung COVID-19 wara prokshiba ajanga nübur tsüngda kanga aoksatepdar aser iba wara ya talisa matamabensar dak temelaba atongtsü ana nung dang lir.

Iba dak alia, tang linük nung maparen ajunga shibangja lir aser iba ama mapang ka nung matamabensar aser kibong züngsem rongnung matamabensar kar lira parnoki timtem tulu ajurutsü akok.

Iba ama tensa nung, parnok nüngdakbatem, titi inyakba maparen balala aseni angatetta alitsüla aser iba den külemi parnok kümzüka yutsütsü asoshi mapang shia asenoki parnok dak tenük yoka mapang peria agütsütsüla.

State Sorkar aser department talisa Health & Family Welfare ajanga agütsüba tetuyubatem ya sensopur ajaki anidaktsüla.

Ajisüaka, March 26, 2020 nü Department of Empowerment of Persons with Disabilities, MoSJE (DO No Secy/1/2020) ajanga tuyuba ama, COVID 19 wara prokshiba mapang matamabensartem kümzüka ayutsüc asoshi District Administration temi tsünglanglen agüja aliba mapatem inyaktsüla.

1. Emergency response service achaayangtsü asoshi nünglokja alir ajak matamabensartem den külemi tanga timtem alirtem anepalutsü asoshi training agir alitsüla.
2. Matamabensartem nem teyari agütsütsü dak sendakba nung osangtem ya awareness campaign ajak shilem asütsü.
3. Kidang mesüra kibong nung matamabensar züngsem karbo tangalen nungi anepalur anir aruagi reprangdakja alitsü akok. Iba amala mapang ka nung (linük ajunga shibangba), anepalurtem (caregivers) ya tenokdangba kecha melii matamabensartem anepalua reprangtsü asoshi senzüdaktsütsüla.
4. Iba ama tensa ka nung matamabensartem wara nungi kümzüka yutsütsü aser parnok dak kangarabo mekongshitsü atema anepalurtem (caregivers) Personal Protective Equipments (PPE) semokdaktsütsüla.
5. Nüngdakba chiyongtsü, tzü, mozütem akok tashi matamabensar nem agütsütsüla. Item nüngdakba ya parnok quarantine sür aliba tesem mesüra parnok talidak tonga bener oa agütsütsüla.
6. Teintet rogo aser matamabensartemi parnok nüngdakba peria alitettsü atema district ketdangsertemi osettsüset ayokba store tem lapoktsü asoshi mapang lateta yutsütsü akok.