Covid-19 osang mebelenshitsü metetdaktsür

Dimapur, April 15 (TYO): Covid-19 dak sendakba miim osang yimjak nung metetdaktsürtem ozüng tapet agi merenshitsü ta Nagaland sorkari Bodbarnü ashi.
“Nisung kari Covid-19 dak sendakba miim osang kar social media nung prokshiogo. Covid-19 aketertem indang maitsü metetdaktsüba ya Nagaland Epidemic Disease (COVID- 19) Regulations, 2020 kübok ozüng alema inyakba mapa ka lir” ta sorkar sangdong ka nung ashi.
Tekümdangtsü kecha meshii dang sorkari iba mapa inyakertem merenshitsü, ta sangdong nungsa shia lir.
Sorkarisa Administrative Head of Department (AHoD) aser Head of Department (HoD) temi dang osangbener den jembitsü atema tetuyuba agütsüogo.
Department tenüng nung jembitsü temelaba malirtem den sensaksemba aser parnoki ashiba nung ajemdaker osangtem prokshiba ajanga nübortem ratadaktsür. Anungji, department nung AHoD aser HoD dak alaka, shingaia pei department dak sendakba onüktem jembitsü memelar, ta sorkari metetdaktsü.
“Temelaba maliba sorkar mapa inyaker kari danga media mesüra press den jembiba putetra ozüng tapet agi merenshitsü” ta Chief Secretary Temjen Toy-i ashi.