Covid-19 tendangtsü asoshi testing kit tasen yanglutetogo

Mumbai, Metsüremi/March 24 (Agencies): Pune nung amendaker aliba Mylabs Discovery Solutions puri COVID-19 tendangtsü atema testing kit ka yanglutetogo aser iba ajanga mapang tesadang dang agitsü.
Molecular diagnostic company, shirnok nem Hombarnü authority-i temelaba agütsüogo, parnoki Lonavala nung parnok indang facility nung anogo nung testing kits 15,000 dak tema yanglutettsü koba anogo nung kit 25,000 tashi yanglutettsüsa ajungkettetsü, ta company co-founder Shrikant Patole-i ashi.
South Korea nung inyakyim indang ateshia World Health Organisation-i iba tashidak den raratsü asoshi tashidak tendangtsü nüngdakba lemsatepogo.
India nung tang tashi nung nisung 500 tema dak iba tashidak aliba putetogo saka mongintemi tashidak maneni prokshia aotsü ta tsübua bilemer aser linük nung iba tashidak kanga ajema tendangba tuteta shiogo.
Patole-i ashiba agi, company-i ‘Mylab PathoDetect COVID-19 Qualitative PCR kit’ amshia tashidak tendangba mapang ghonda anaser tesadang agi tajemba kümdaktsüogo, koba taoba mapang ghonda 6 nungi 8 tashi agia liasü. Mapang tatsüba kümdaktsüba ya team-i screening aser confirmation mapang mapa ka nung dang inyaktettsüsa inyaktetba ajanga lir.
Iba tashidak agi mapang ka nungbo India kongshitsü ta bilema Company nung scientists 25-i hopta trok tejakdang iba inyakyim tenzük, ta pai ashiba den company ya 2012 küm trading firm ka ama tenzük aser 2016 küm bushitsüngdangtsü tenzük.
COVID-19 tendangba ajanga asymptomatic patients tem positive cases dena putettsü, ta Patole-i ashi. Paisa, Mumbai, Kasturba Hospital nung patients ka indang sample tendangba sülen National Institute of Virology, Indian Council of Medical Research aser Central Drugs Standard Control Organization (CDSCO)-i temelaba agüja liasü, ta ashi.
Mylab kit den külemi tashidak tendangtsü asoshi German company kati agütsüba solution ka densema shimogo.
Patole-i, tang tashi India nung state meyong National Institute of Virology (NIV)-i yangluba test kit amshia arudar saka tashidak aketer tali akümba sülen tenüngdakba oset yanglutsü asoshi private sector anisemtsüsa kümogo.
Screening aser confirmation naprongla inokra NIV indang testing kits ya sample shia sen 4,500 agir, ta Patole-i ashiba den Mylabs puri iba kit ya pezüben agi tajemba agi yoktettsü ta temulung lema bilemer.