COVID-19 tenokdangba nung aibelenba asem liasü

Dimapur, Aami/June 17 (TYO): Anogoshi State nung Law & Order aser nüngdakba osettsüset aser service tem indang osang sangdongba mapang, Joint Secretary, Hiazu Meru-i ashiba agi, June 17, 2020 nü COVID-19 dak sendakba lockdown nung aibelenba asem liasü aser iba dak sendakba nung nisung asem ozüng agi alen. Iba dak alaka State nung Law & Order tatalokba kecha meliasü.
Osang ajanga ashiba agi, Mokokchung dak alaka state nung tanüngba district ajunga nung jang-o-tzü, aonsotsü, mozü aser mamatzü ayokba dokangtem lapok.
State tesem kecha nunga nüngdakba osettsüset agi anüngba osang mali, ta sangdong ajanga ashi.
Nüngdakba osettsüset alemertem aser e-commerce agent tem senzüsembongba nung tenokdangba agütsüba meliasü, ta pai ashi.
COVID-19 tashidak mechi tenokdangba agüja aliba ajanga kongshia alir migrant worker nem chiyongtsü aser tejenokdang agütsütsü atema tapet mera agia anepaluja liasü. Iba dak sendakba nung active relief/shelter camp ka aser food camp ka lir, ta ashi.