COVID-19 test taila agütsüba tesem ka ngutet

Dimapur, Tsüklai/February 04 (TYO): Dimapur police team ka January 22, 2022 nü surveillance duty nung lia Blue Hill bus station, Dimapur nungi Manipur-i aiba passenger nem COVID-19 tendangba report taila ayoker, ta osang tejangja angazüka liasü.

Iba osang angashiba sülen police team ya passenger ama renemer negative COVID-19 test report bushia ao.

Iba mapang IMA Travels (Dimapur to Imphal) atema inyaker arishi kum 39 tain Mohammad Samung-i sen agi test report ya anepalutsütsü ashi. Yamaji nisung shia atema sen 500 agütsür pai ghonda ka tsüngta report taila ya renemtsü. Iba sülen pa apu aser Disaster Management Act 2005 kübok ken o ka züluoka liasü.

Pua alisangi ashiba agi, passenger tem nungi pai Aadhar card aser sen meshi aser iba sülen Lahorijan, Assam nun glia yangji aliba Testing Centre staff nem commission agütsür COVId-19 tendangba report taila ya meshi.

Iba ken o ya bushisüngdanga aser iba maparen nung dena alir ajunga kanga junga asadanga liasü.

Pa ket nungi Lahorijan, Assam-2 nungi agütsüba COVID-19 test report taila nguteta liasü.