COVID-19 wara dak sendakba nung tongtipang temetettsü kar

Tekaratiba nung Test asütsüla aser temang anepaluadoktsüla
Na kodang Covid tashidak mesüka symptoms kar danga lidir- Tamasabo yimra aki adong ama dang asütsü, aketsü, tangu sashidang timtemtsü, Anungji tekeratiba nung test süa adoktsüla.

Na test asünung ang positive potetra Doctor aser Nurse temi ne nem mozü agutsütsü. Na positive sür nung test mesüi dang lira na ajanga covid tashidak prokshitsü aser temang nung timtem tali ajurutsü akok.

Asenok Mokokchung sasep nunga Covid hospital nung nisung sudar. Ibai aikati menur hospital bushibayong taküm samar. Symptoms to develop asüyonga tetsübo, zübazülemba aser test mesüner kidang shiranga kazür koda masü akümdang hospital bushir. Idangjibo kanga menua doker alir. SPO2 (oxygen saturation) noklang nung tukur pezü shilem (94%) dak tekübokba dang kümer hospital bushir anungji timba ka mekümzükteter.

Covid symptoms lir test masü kazüdang kinunger, kiyonger dak menashia aotsü aser iba wara ya na ajanga talangba atsülangtsü.

Na covid vaccine agir aliyonga covid tashidak menatsü aser tangar nema menaloktsütsü anungji na vaccine agir liaka test asütsüji kanga dang tongtipang aser Covid dak sendakba libaliru yimyatem ((covid appropriate behaviours) amshitsüla.

Contact Tracing
Na test sür Covid positive potetnung contact tracing teami na anogo pezünü pungonü tsüngda shiba sa ajuru ta asündanger tenüng aser contact no meshitsü. Nai parnoki asüngdangbatem pokjipoka shiang. Nai meimshia ayudang contacts tem positive asünungbo parnoki tangar dak menaloktsütsü Na contact tracing nung tensem nungbo tashi anga isolate süa atar test asütsüla.  Contact tracing teami ashiba mangai na covid positive sür nung test mesüi tang lira na ajanga tangar nem menaloktsütsü

Tashidak tamajungba akümba
COV-2 indang Delta variant ya tesashi variant lir. Delta variant agi tongaka shirangba kanga bo malitsü akok. Delta variant agi shirangba yimya temji- anogo anunu (2 days) temang tera metatsü, yimra agi adonger ama asütsü aser anogo anünü lir (after 2 days) shirangji anentsü akok. Iba sülen kar anebadoktsü mesera kar talila shirangtsü akok. Shirangba yimyatem yamai alitsü-temang metatsü, aketsü, terok ashitsü, temang nguyangoshitsü, tokolak menutsü, tashi maitsü, tepok aotsü, saktsütsü, kecha memenemtetsü aser chiyongtsü achiyonga taste kecha malitsü.

Nisung ka kodang tashi agi shirangtir tango sashiba minute ka nung rate 30 mesüra tema akümtsü aser SPO2 ajema adoktsü.

Pei kidang oxygen saturation SPO2 koda reprangtsü
Shirang tenzüker SPO2 ya normal alitsü. saka kodang tashi agi shirangdir SPO2 tajemba akümtsü. Covid positive puteter kidang among nung (home isolation) pulse oximeter kidang akatsü tim. Kidang Oximeter mekara anasatiba health centre nung tongtepratepang.

Mokokchung Municipal area nung alirtembo Mokokchung Town Baptist Arogo (MTBA) nungia pulse oximeter ken atema amshitsü angutsü.

Temang nung oxygen saturation SPO2 normal rate ya noklang nung tukur pungo shilem (95%) dak tema. SPO2 rate ya 94% tema nung lira home isolation sütettsü mesüra Covid Care Center nung mongtettsü. SPO2 rate 94% nungi tajemba lira tekeraba nung Covid hospital bushiang.

Covid positive tem kidang alidang (home isolation) anogo nung pezuben (4) nungi terokben (6) bo sa SPO2 rate tendanga alitsüla.

Co-morbid tem anepalutsü yim
Co-morbid ya diabetes,highblood pressure, cancer, TB, Asthma, allergy, stroke, temulungjang tashidak aser tanga tejen tashidak agi shiranga alirtem dang ajar. Parnok ya covid symptoms adokra tekeraba nung hospital bushitsüla.

Covid vaccine agitsüji kanga tongtipang
Covid vaccine agir aliyonga covid wara aki atongtsü koka lir . Tangar nem menaloktsütsü akok. Saka na covid vaccine agir lira covid tashidak agi menebaka tashi aki meshirangtsü aser tasuba nungia kümzüktsü akok. vaccine magi covid agi tashi agi shirangatokra taneptsü nguaka temang nung timtem adokba ajanga akhi libalirua aliba yimya dangi shilangtsu tasak asütsü. Vaccine ya angati angutsü aser jinjang talang lir saka taküm samaba jenjangji kanga dang tulu.

Anungji Covid-19 wara ya asenoki zübazüba magitsüla. Kechi teinyaktsü lemsaogo asenok ajaki temulung agütsüa inyaktsüla.

– Department of Health and Family Welfare,
Mokokchung, Nagaland.