Covid-19 wara Lockdown mapang Delhi nung aortem tia

– Dr. Walunir.

Covid-19 wara nokdangtsü asoshi India sorkari Lockdown tenzükba den külemi Nagaland House Delhi (NHD) DRC-i anir, NHD Resident Doctor, NHD Public Relation Officer den Naga Kin Tanishirtemi ‘Nagaland Emergency Center Delhi’ tenzük. Iba telok ajanga Delhi nung Naga nunger talidak malir, shilu-manemer, asür-amaer aser chiongtsü malir yaria arudar. Iba Emergency Center ajanga May 13, 2020 tashi nung Delhi nung Naga nunger nisung 1560 nem chiongtsü agutsüogo. Iba den külemi, talidak malir eshika Nagaland House nung lidakja masüdar. Lockdown mapang nung Naga nunger tia makai kar danga südok-matok ajurura, Naga nunger tasür ajak leper ka nung dang temang aremtsü ta lemteter, Burari Christian Cemetery, Delhi shimteta ayu. Tanü tashi, Delhi nung Naga nunger hospital nung treatment agia shiranger 70 shi lir. Item ronugnungi parnok kanga serious 40 shi lir – kar tasü yipden nung aser kar treatment tagidak. Parnok ama shilu-manemertem, Delhi nung mozüki palala nung teinyaktak Naga nunger Doctortem group ka tenteta emergency medical cases yaritepa inyaker.
Iba Lockdown mapang nung Aotsür-Aor temolunger sen tenlatepa teimtemer yaria arudar. Delhi Ao Senso ajanga Aor kanga rokonga nungdaker sen agi yarir. Ano Delhi Ao Arogo ajanga May 13, 2020 tashi nung Delhi nung Aor chiongtsü makar nisung 519 shi nem chiongtsü agutsüogo.
Delhi nung Aor kibong 85 shi lir aser item kibongtem government aser private sector nung mapa lir aser tang tashibo mapa-i ao-mao ta mali ita sen ngutar. Ano Delhi nung Aor anunapang kipong 80 shi, sasü anema alir lir. Delhi nung Aor Kaketshir 200 shi nungi 80 shi kidangi mao lir, saka parnok teimba ka tsürapuri sen yoker.
Delhi nung alir Aor lanur mapa inyakertem parnok 450 shi nungi private sector nung mapa inyaka alir 250 shi kanga teimtemdar. Parnok aika mapa inyaka aliba, March 25 Lockdown nungi mapai mao tanü tashi ita sen mangur. Tsürapur takoker tashi-i sen apua chirnur dang-i sen yoker. Saka aika kangasa sensaker chirtema lir; parnoki ang tsürapur dangi sen yoka aliba, tsurapur dang nungi yimlatsü tamakoktsü tia nung lir. Joko company tila aika Lockdown mapang nung shibangba ya teti asoshi asoshi teshibang akümtsü tia nung lir, anungji yamala nung inyaker Aor parnok aika mapa teti asoshi samatsü. Yamaji ano meshisemba teimtem tia nung alir aika lir aser parnok aika Nagaland Government-i adokba ‘home returnees’ form agutsür, Nagaland government-i achiayangba sendong nung kidangi meyipa aotsü yongya-a atatar.
Delhi aser jila palala nung alir Naga nungeri Covid -19 wara lendong junga meteta lir aser asen Nagaland tiaji tangatet asunung kidangi meyipa aotsü kerako ta masür. Talisa Red Zone aser Ornage Zone nung alirtemi Covid -19 tashidakji Nagaland-i memeteti pener aonungbo; mesüra kidangi meyipa aodang, flight, train aser bus nung Covid-19 tashidak ji menatep nung bo; mesüra Nagaland Quarantine Center nung amongdang Covid-19 tashidak ji kar dak nungi menatepa aonungbo – ta yamala tepilemtsü khuret aika alir. Anungji yamala khuret angatetba agi nisung aika teimtemaka Nagaland-i meyipa maotsü temolungtetba lir.
Saka teimla maka shirangertem – pei tasoli nung ang sunur aser temang remnur ta asura lir; sensaker chir-nor mapa anener ita sen mangu chiongtsu alitsu aser rent agutsutsü sen mali aser sen tarutsu lenmang kecha maali aika lir. Naga nunger alima palala nung ‘stranded’ alir ajakji masü, saka kanga teimtem nung alir ishika pei tasoli anir arutsü asoshi tekeratiba nung lenamng yanglutsüla. Nungdak-a dang süra, kidangi meyipa arurtemji Covid-19 test Negative result bener ang arudaktsütsü koka lir. Aser aji sür-a ano Nagaland quarantine facility nung anogo 21 lir kelen, Covid -19 test ano ken agir ang pei kidangi yoktsü ta inyaktetba. Anungji kangasa timtemertem kidangi mayipa anir arutsü maparen, parnok asoshi quarantine facility tajung aser Covid – 19 testing facility agutsütsü Nagaland Government-i inyakteta dang lir. Ya arok aroka shisaganga, kümdanga inyaktsü mapa asünung, Civil Society lenirtem aser Nagaland Governement shisha tajung agütsütepa opang ka nung iba mapa küma aotsü sendong tajung adongtsüla.