COVID-19 wara nungi kümzüka alitsü lenmang kar

– Dr Toshimanen Ozukum, Kohima.

Tang alima ajak nung corona virus wara tesashi agi nüburtem ajak tsübudaktsür. Iba ama wara nungi kümzüka alitsü atema nisung aikati pei akokba rongsen, shisatsü, temetetba aser sarasadem agi yariteba arudagi. Iba asoshi nübur ajak dang kanga tang pelar. Tongtipangsa iba tongpang nung nokdaker WALUNIR kwikati pei takum agi tenlaogo, parnok ajak Teyanglur Tsüngremi tali moajang.

Yangi nia ni metetba iba wara tesashi nungi asenok ama teküpok tia nung alirtem atema kümzüktsü lemang kar iba ocet ajanga lemsateber:

KÜM 100 shia iba alima nung wara tapu balala agi yamai meimchirtem timtema südaktsü.

1720 küm  tepzünu tesashi adok.

1820 küm saktsüpokshi wara tulu liasü.

1920 küm Spain nungi tenzüka alima tesem aisü nung Spanish flu yimra tesashi agi nisung jendi asü.

2020 nung ajak dang tamajungtiba CORONA VIRUS agi nisung jendi südaki aser iba wara agi asen lima-a tongogo.

2003 nung SAARC FLU agi alima 26 nung nisung 10% asü, 2009 nung swine flu agi shilem 4.5% asü aser 57 million timtem angu. 2014 nung EBOLA wara agi 25% tim atem aser nisung 11,000 asü. Tang 2020 nung CORONA wara agi alima ajak mobangogo aser nisung  lakh 3 dak tali süjen südagi.

Akhidanga wara tapu tapu agi nisung jendi asü. Aji saka taküm CORONA wara agi tonger pusatepba amabo alemli maliasü. Ya koda asü ta tatalokbatem reprangdangra yamai lir:

 2003 nung social media, Facebook, WhatsApp amala kecha maliasü.

2009 nung Facebook nisung million 150-i amshi.

2014 nung Ebola wara aliba mapang nisung 450 million-i Facebook aser WhatsApp amshi.

2020 nung nisung 2 billion-i WhatsApp amshir aser billion 1.69-i Facebook amshir. Aji oda tanü alima nung nisung billion 3-i social media amshir.

Tanü putu nung tanur chanu ka jaja ashiba den o jempitsü ashiba anogo nungi tenzüka iPhone amshirji osangtsüsang ya yakta dang mopung nung prokshir. Kar tejangja, karbo tanur salepsaraba ajanga nisung ajak posabolemdaktsür. Aji saka putu tensa agi ojangdangji pei sasa kümdanga alitsüba mapang agi tongogo.

Osang kaket ajak nung, ano radio nung yamai ashir. CORONA wara nungi kümzüka alitsü atema lokdi senden malitsüla, sentep malitsüla, yimdongi maotsüla. Ki shibanger chiyongtsü tajung achitsüla. Aji kanga dang shidak. Saka chiyongtsü tajung alitsü sen kong nungi angutsü, ajibo shingaia mashir. Anungji iba tajungshi o tajungji nang nanga agizüktsü tasak.

Anungji sorkar nungi nütsüng zünger kibong shia sen tasazük pei pei kibong account nung finance department nungi direct inoktsütsüla.Taküm küm atemabo itasen wazüka yur tanungbaji kibong asadanger development sen ajakji alemtsüla. Ibajidang LOVE IN ACTION  ta Naga nunger ajaki agizüktettsü. Village Council, Ward Council mesura Department ajanga kecha sena malemtsüla, kechiaser Naga nunger ajak yangko semerang awazürji sensakerbo kecha teyari mangur. Nagaland department balala nung sen aruba ya züngdangra kibong shia küm ka atema teperi lemsateptettsü. YA KHEN BILEMDANGANG.

Tang rongdak nüngdak kaji, Quarantine Center peria mali ta jembir. Aji saka Kohima nung alir asen adianü Mr. S.T Yabang Lkr-i Tir Yimyim nung May 26 nungi 28 tashi nung Naga lima  nung Quarantine Centre amshitsusa ki, hostel, youth hall peria dang yanglua lir ta osang tejangja züluogo. Iba list Sl No. 121 nungi 143 tashi nung Mokokchung District nunga peria yanglua lir ta ajiteter. Tangbo lokdi senden kecha malirji item ajak agi 223 kidangji Naga lima adena orr alirtem anogo 14 atema sadem sadema anenzüka amongtsüla. Adianu Yapangbai mapang mapangshia Tir Yimyim nung asen lima atema aruba sen-o-tsü indang adoktsür. Ibaji tejang tangyaa alitsü ta amanger.

Tatemsa yimdak alir, Town nung alir takar sensaker ajaki inyaktettsüba iba CORONA wara nungi kümzüka alitsü tajungtibaji yamai lir:

1. Kittle nung tzü jaa moludang tango adokba agi teni, tebang aser tenük anogo nung pezüben (4 times) tzü talem tangu jagi alettsüla.
2. Anogo nung pezübenbosa tzü talem agi terok shidoktsüla. Kechiaser iba mesen ya terok nung tama ademer. Iba mapang tzü talem jagi jemzüka yokra yangji asütsü aser nisungji kümzüker. Ajungbena iba mesen ya tepokpoki yira, lungs infection agi ghonda ishika nung asür.
3. Anungji anogo nung tzü talem mesüra bikacha pezübenbosa ajemtsüla. Iba mesen ya temperature 27 degree Celsius nungibo asür ta ashir.
4. Anogo nung minute 10-15 tashi anu talem awangtsula.

Iba pezü ya inyaktetra mesenji asenok dak atemyonga anogo 4 nung shirangbaji aneber. China nunger nisung ajaki iba amaji inyaker. Ibajagi parnok iba wara nungi kümzüka alir. Ajak dak alaka iba wara ya Tsüngrem nungi meimchir dangi temerenshi aruba lir. Alima nung rongsen onsara jateta adoker meimchirtemi Teyanglur Tsüngrem anema temenen inyaker, nüktabangda, jaubjari agi Tsüngrem teni tonga atuba ajanga iba wara ya aru ta angateter. Tebur o tebur na, tetsür o tetsür na kibong akümtsü ozüngi melaba ya Tsüngrem anema lir. Nisungi shiruru den nüktapangda benshir. HIV/AIDS ya Africa nung nüktapangtatsür kati shingo den nüktpangda benshiba nungi menaba nüktapangda tashidak lir.

Anungji temenen ajak doktsür asen Teyanglur Tsüngrem bushitsü mapang tongja tongogo ta iba ocet ajanga lemsateber. Nisung kar danga temoatsü ngura Tematiba asen Teyanglur Tsüngrem tenüng sangang.