Covid Election

Tang ya Covid 19 tashidak wara menatepa ao tsübuba agi nisung shinga among adena maor aser tarua mashiibo marudaktsür. Ano, pei adianu aser kinungersa süaka bendanglen nungi arurtembo tesem balaka nung tashidak ali mali tendanga anogo 14 monger külenang pei kidangi arudaktsür. Iba sülena pei kidang anogo 14 kima yimdong kechalenia moi amongtsü. Ano, pei kidangi aruner saka marutetter ta ano India tesem balala nung Naga nungertem aika timtem nung lir. Joko, March tatemlen ka nungi tanü tashi mapaia mao kidang-kidang dang amonger asünungji, kibong aika achi ajem nunga kanga timtem ajurudagi. Iba denji külemi Covid 19 agi shiranger joko noklang tema atur, anungji mozü kidang shiranger nem oxygen agütsütsü renemtsüba mapajibo yutsür shirangertem akua mejangtsüsa yimten agütsütsübajiang government asoshi mapa tuluba kümmdagi.Ano, tebilemtsü ka bendenlokbaji Naga nunger meyirijang aika bendanglen mapa tapu balala nung inyaka alirtem to mapa nungi katir kidangi meyipa arua lir aser parnokji tangsabo tanaben meyipa moutetsü.Iba ama mapang ka nung Nagaland nung assembly election agi nunga Naga nungertemi aser talisa Aortemia komaka shilem agila ta taoba hopta nung asenoki bilemdangogo.Covid 19 wara agi asenok memenepdanga asenoki kanga bangpetsa jembibaji government nung ochimashi mapa inyakbatem indang jembia liasü. Aji oda,tenla kidang aiben sayutsüngirtemi ochimashiba lenmang nungi meyiptsü tayongzükba agüja jembi, ken aser sangro mejemertemia asen lima nung ochi laoa aliba indang ken aser sangro mejemba atenba angashidang asenok mulungjang nung kongshi. Ajisüaka, asenoki asen lima nung ochimashi agi komaka asenok akoksadaktsür ta asübajibo asangsang nung memetet aser majangshii arugogo. Aji oda, tangang asenoki government mozü ki junga yanglua melira asenok ajak khen nung samatsü ta jangjar.Tangang asenoki power supply shitak melira mozü ki nung dena mapa meinyaktettsü ta jangjar.Iba kasaji tangang asenoki Govt mozü ki shia nung ICU takdang aser ambulance gari junga anepalua ayutsü nüngdakba indang angatetter.Tangang asenoki government school nung azüngertem asoshi computer nüngdakba indang angateter aser government school-tem nung tesayurtembo tajung tesa ser nung kibur maliba agi school-tem mejungi akümba kulitem angur.Aji oda, tangang timtem shisabolu mapang tongtepratepa shisatsü aser teyari asüngdangdak lenir alitsü nüngdakba indang bilemer. Iba ama mapang ka asen lima nung election agika asünunga, tang kibong shia relief jang den atta, moita,alo, dal aser totzü tashi lemtsüyonga aruba yagi peritsü asü kechikomaka süla ta temulung animesüngzükteti bilemer. Iba ama mapang ka nung election agika asünunga yimten teloktemi nübortem dang kechi shia jajala aser nübortemia kechi nüngdakba indang shila ta asenok ajak mulungjang nung bilemdangtsübaji kanga tongtibang kümogo.Tang tashi nung asenoki sen, injang, bomb, süng long, yi aser drugs tashi amshia election agiogo.Item hadirtemjiang amer tang asenok Cobiv 19 tongpang nung nokdaka lir. Joko asenoka tan südi aser kodang election agidir, asenokbo asen lima nung government school, government mozü ki,government power supply, government gari lenmang tajung nüngdakba indang jembidi. Itemji dang jungerbo tanüngbajibo asenoki asenoksasa industry dena lapoka otettsü, alua yimtettsü aser tanga mapatema kanga azükarua inyaka otettsü.