Mozü kidang inyakertem yaritsüla

Tang ama alima ajak ayimsünga, nokdangaka menokdangtet, tashidak wara aoba mapang yabo mozü kidang inyakertemiang shirangertem yaritsüba masü saka meshirangertemia mozü kidang inyakertem yaritsü kanga rongdak nüngdaka kümogo. Covid-19 tashidak wara ama ya yimbazüa bilemtsüba tashidak masü, khen mekümdanger asüdang manger sangwa nung asenok tango tangadoktsü. Yaküm küm mezüng asen lima tashi iba tashidak wara mesen agi tonga arudang, asenok tebilemtsüji bendanglen nungi arur asenok kinunger adianutem anogo ter pezünü tesem balaka nung quarantine süa ayutsüba mapa liasü. Iba mapang asenok nübortemia government den yaritepa inyakba agi tashidak wara takok ngua nokdangtetogo. Ajisüaka, ano tzüim nung tanaben yipru tesashi arua tzüsem nungteta adok ama, tangsa tesashiba küma kasa tashidak agi asen lima kangshidagi. Joko, tang yabo yaküm küm ama bendanglen nungi arurtem quarantine nung ayutsüba tebilemtsü masü saka mozü kidang shirangertem asoshi yipten aser oxygen peria alitsü nüngdakba tebilemtsü agi tonga lir. Tia junga asen lima nungbo tang tashi shirangertem yipten agi makuba mesüra oxygen agi anüngba timtembo mali, saka India tesem aika nung mozü kidang yipten agimadokba aser yipten aliyonga oxygen maliba agi shirangertem repranga lia südaktsüba, temulung ashitsü, otsü aika atalokdagi. Itemji government-i dang masü saka nübortemi dena pei teinyaktsü meinyaki tangar dak dang imlaba ajanga atalokba timtemtem lir. Aji oda, tamasa quarantine center agi timatem aser tang yipten aser oxygen agi timatemer, iba sülen asenoki meyarisemra, tang anema alirtem asenok shirangdangbo mozü kidang inyaker doctor aser nurse-tem agi anüngtsü. Iba tensa tiaji, matalokia ataloktsü ama bilema asenok nükla nung, mozü ki kilong nung dang masü saka kima dena peisasa yipten bener arua laoker, yangji shiranger agi tasüng mejanga lir saka anepalur mali ta yimdangi arua angutsüla. Iba amaji matalokdaktsütsü atema tang anema alirtemi mozü kidang inyakertem yaritsübaji, mozü kidang oagi parnok mapa nung yarisemtsüba masü saka asenoksasa asenok meshirangtsü merangbaji doctor aser nurse-tem mapa nung yarisemer amai asütsü. Talisa asen lima nung mozü kidang inyakertem agi kanga anünga lir, anungji tang mozü ki masüng shirangertem kar aliba purtem yaritsübaji mapa tulu lir. Iba ama mapang ano, tia mejungi, mozü kidang inyakertemjiang shirangadokra matong ali nung temdok ama asütsü. Atangji, tanga mapa nungbo nüngdakra nübortem rongnunga nübo agi yariteptsübaji temulunger aika adoktsü, ajisüaka mozü kidang shiranger yaritsübo temulungtetba kisüng agi makoktsü, saka mozü metetter aser shiranger yaritsü shia meteta azüngertemiang yaritettsü. Iba ama tensa tia ka nung, asenoki mozü kidang inyakertem yaritsübaji parnoki ashiba angaa asenok lokti mesentepi alitsü, menüngdakba nung kimalen mesenzütsü, kisemtsüsemi maotsü, koda masü kanga nüngdak nung jajadang teti teni tebang nembanga mask temerük agitsü, teti sapon agi teben shidoktsü, temang tashi itta alitsüsa süngolemba aser süngjanglijang agi tua chiyongtsü shitak achitsü aser neptsübangtsü yima, aketa mesüra tekolak menüa aser temang metaa temang tera danga meshitaki kümra, doctor-tem den asüngdangtepa yakta mozü achi tenzüktsü. Iba ama kidang temang meshitaki amongdang, ki ka nung asüyonga, akok tashi, kinungertem den külemi takdang ka nung melii balala nung lia chia ajemtsü aser mejangtsü. Iba ama asensasa kümdangba agi, asenok shiranga adok nungbo mozü kidanga mesemi shiranger bendentsüba tensa tia to memetetika melenadoktsü. Kodang mozü kidang, tang ama tashidak wara tamajung agi shirangertem yarir meyarima arudir, idakji inyakertema tali aniapongtsü aser meperimanang aser petsaperong aika adoktsü. Tang tashi Covid-19 tashidak ya kong komaser poktetar mejangjar, saka nisung mapa ajanga poktetba tashidak lir. Iba kasaji Covid agi shirangertem anepalu mesütet, mozü kitem aika nung timtem lendong atalokbajia nisungi yangluba timtem asütsü. Iba amaji matalokdaktsütsü yarisemertemji asenok asütsüla.