Covid mozü agitsü ajungshir

Ajungbena alima tesem ka nung khen, ka nung khen ta yaküm 2020 küm Covid-19 tashidak wara agi menepa arudang nisung ajaki Covid mozü yanglutettsü yongya aser tesem kar nungbo shitakba Covid mozübo masü ser nung sen aika agi raktepa alitepba osanga liasü. Aji oda, Covid wara prokshia aoba tialong nung asenok shinga pei kidang nungi mayazükdaktsüi ita dak tali mongdaktsüba anogotem to bilemdangra aonung pongmang amai bilemer. Ajisüaka, iba to asangsang nung asen putu nung ajuruba alima tensa tamajungtiba rongnung ka asütsü. Iba mapang to asenok ajak asoshi sarasademba mapang tajung ka liasü. Asenoki asen taküm aser kibong Covid-19 tashidak nungi kümzüka alitsü asoshi dang masü saka alima nung doctor aser nurse-tem asoshi sarasademtsü aser medical scientist-tem nem Covid-19 mozü bushitettsüsa shisatsü agüjang ta sarasademtsü. Aji oda, tanü asenoki sarasadema yongyaa ataba ama medical scientist-temi Covid-19 nokdangtsüba mozü ngutetogo. Item rongnungji, asenok tia ajung, alima nung Covid-19 mozü tajungtiba asütsüsa India nung yangluteta lir. Item mozütemji India nunger asoshi dang masü saka alima ajunga asoshi yanglur. Iba jagi India dang alimai “World Pharmacy” ta ajar. Ajisüaka, ano Covid-19 mozü agitsü ajungshiteptsü melen olulu tapu balala adoka Covid-19 mozü agitsü arendaka bilemtsüsa jembibaji alima nung alir ajak asoshi tia majung asütsü. Iba jagi, ashiko, mozü kidang inyakertema karbo tsübuba agi Covid-19 mozü agitsü asoshi parnok nem tama maongka agütsüaka magii alitsüa akok.Ibaji pei asoshi dang masü saka tangar asoshia khuret (risk) tuluka bener arutsür asütsü. Covid yabo menatepa aoba tashidak asünungji, asenok memenatsü atema kisüng kümdanger masü saka asen dak mena nungbo kidang kinunger aser mapa inyakdak külem inyakertem ajak dak menatepa aotsüba tashidak asüba agi talila kümdangtsüsa adoker. Ibayongji, ashiko Covid mozü agiba jagi karbo khenbo temang metaa timtem ajurutsüa akok saka iba jagi asen dang masü saka nisung aika taküm kümzüker ta angatetdi. Aji oda, January nung mezüng Covid mozü ya mozü kidang inyakertem nem agütsür külen, yakanü nungi arishi küm 60 ser tema pur den ano küm 45 nungi temapurtem rongnung shirangertem nem Covid-19 mozü mezüngren (1st dose) agütsüba sentong tenzükba anogo nung, linük nung ato kilonser, Narendra Modi aser tadong tir Venkaiah Naidu nati anir mozü agi tenzükba jagi olulu jembiba ajak to nembanga yutsüogo. Aji oda, ano külen state-tem kar nung chief minister-i anir yimsüsürtemi Covid-19 mozü agia sayubaji Covid-19 tongpang akoktsü tetenzüker asütsü. Asenoki aiben asenok dak mekongshira zübazübaa bilemer, iba jagi asenok aika taküm nung yimra agi tashidak tulu kümdaktsür aser aneptsüba tashidak agi maneptettsüba tashidak kümdaktsür. Alima nung olulu tapu tapu jembitsüa akok, saka asenoki angatettsüba mapa kaji medical scientist-temi senotsü tajangzük aser tenüng agitsü atema taila mozü yanglur alima nem magütsütsü. Ibaji mozü agirtem dang nungibo parnok asoshiang lendong tuluba asütsü. Aji oda, koba mozü südirsüaka jungjunga tendanger külenang junger ta kuli sütet nung dang nisung nem agütsütsü melar.Iba mozü agitepba maparen nung, ajak dang osang tajungtibaji, tang arishi küm 60 ser temaba purtem nem Covid mozü agütsü tenzükba mezüng anogo nung, Hyderabad nung arishi küm 100 tain ka kecha timtem mali Covid-19 mozüjem agibaji asütsü. Nagaland nunga yimsüsürtemi anir nisung taintem aika mozü ki bushia oagi Covid-19 mozü agi tenzükogo. Iba mozüjem ya nisung shia anabenren agitsü asünungji, mezüng agiba anogo sülen anogo 28 lir külen tanabuba aser tesüsabaren agitsü.Tang tashi nung Nagaland nunga mozü kidang inyakertem rongnung Covid-19 mozü agirtem shinga daka iba mozü agi mapetba osangbo mangashi. Joko, asenok rongnunga Covid-19 mozü tsübua alitsüba masü saka Covid-19 agi atongang tsübua nisung ajaki, tang angati angudang ya, iba mozü ya agitsüla.