CP Dimapur-i coordination senden ka ayonga amen

Dimapur, Nov. 06, 2019: Bodhbarnü conference Hall, Commissioner Police office Dimapur nung Naga Council Dimapur den tribal tentettem aser melungtet teloktem den coordination senden nung Commissioner Police Dimapur tasenba, Rothihu Tetseo IAS-i jembiba noksa nung angur.

Dimapur, Nov. 06 (TYO): Dimapur district tajungba akümtsü atema longjemer team ka ama inyaktsü nükjidong nung Commissioner of Police Dimapur tasenba, Rothihu Tetseo, IPS-i November 6, 2019 nü conference Hall, Commissioner Police office Dimapur nung Naga Council Dimapur den tribal tentettem aser melungtet teloktem den coordination senden ka ayongzüka menogo, ta Bodhbarnü ketdangsertem osang ka ajanga metetdaktsü.
Senden nung Tetseo-i yimjung aser tesünep alitsü atema Police aser district administration-i inyakba nung melungtet teloktem aser lokti tentettemi yaritettsü shilem indang jembia liasü.
Dimapur ya mini Indian city ka lir aser shishilembatsü atema tesem tajungtiba lir, anungji Dimapur yimti ano tajungba akümtsü atema Hohos, melungtet teloktem aser lokti tentettemi longjemer team ka ama inyaktsü nüngdak, ta paisa ashi.
“Dimapur aser Nagaland nung aliba nüburtem nem tesünep aser security agütsütsü atema Nagaland Police-i tajungtiba inyaktsü, aser ni-a kü tajungtiba agi inyaktsü,” paisa shisem.
Iba senden nung Naga Council Dimapur, Hohos aser melungtet telok balala nungi züngsemtemia jembi aser akokba tashi CP tasenba den amalitepa inyaktsü, ta nangzük.
Iba senden ya ADCP Crime Dimapur, Relo T Aye leniba nung agia liasü.