CP Dimapur-i ozüng alema inyakertem azüoktsü ayongzüker

Dimapur, June 9, 2023 (TYO): Commissioner of Police, Dimapur Kevithuto Sophie, IPS-i Hokolbarnü CP Conference Hall, Dimapur nung Dimapur, Chümoukedima aser Niuland nungi public lennirtem den sensaksem sentong ka ayonga agiogo.

Loktiliba ali tashi ozüng alema inyaksangshiba mesamatsü aser item khuret koktettsü atema asenok ajak longjemer inyaktsüla, ta Kevithuto Sophie-i ashi.

“Ozüng alema mozü shibelenba, tashiyim agi sen saruba, yi memeyoktepba aser ILP tebilemtsütem anema asenok ajak amalitepa yaritep nung dang takok angutsü anungji public lennirtemi mapang shitak nung Police department nem osang sangoktsütsü ayongzüker” ta paisa ashi.

“Public lennirtemi pei pei colony aser yimtsüngtem nung lokti anema inyakba osang prokshitsüla aser GBs o village Council-ia tangalen nungi arur nem PRC kanga dang kümdanga agütsütsüla” ta Commissioner of Police-isa metetdaktsü.

Highway nung gari mashii aniba ajanga lendong ataloker aser lendong teimbaka two-wheeler anishirtemi ajurur, ta paisa tebilemtsü ka lemsatep.

Iba sentong nung DCP Niuland, ADCP Dimapur, ADC Chümoukedima, GBs aser CSO lennir balalai pei pei tebilembatem lemsatepa liasü.