CPI lenir Raja-i Sonia Gandhi ajuru

New Delhi, April 26 (Agencies): Communist Party of India (CPI) lenir, D Raja-i New Delhi nung Congress Tir, Sonia Gandhi ajurua taruba Tir election atema o lemtepogo, iba senden nungsa pai Congress lenir dang secular partry tem longjemer Tir candidate ka shimtsü atema party-i melunga lir, ta metetdaktsü.
Sonia Gandhi den senden tembanga amenba sülen osangbenertem den jembidang Raja-i, “Iba senden nung Tir election atema-a süoka jembiogo. Tir election nung ozü party tangatetba ni la nem metetdaktsüogo. Longjemer candidate ka shimtsü atema onoki tanga secular party tem den obang ka sür inyaktsü melunga lir,” ta ashi.
“Onoki tanga party tem dena jembidar. Longjemer candidate ka shimra ibaji junger asütsü,” ta paisa ashi.
Raja-i ashiba agi, iba senden nung candidate ji shiba shimtsüar iba indangjibo mejembi.
“Onoki ashibaji lai (Sonia) angadangogo aser kü den ai-aura kaogo. Laia nisung aika ajuruogo aser tangartem ayongdentsü meranger,” ta Raja-i ashi.
Raja-isa, iba senden nung tang linük yimtenren tensa indanga jembiogo aser nashi kümzükba onüka jembiogo, ta ashi.
“Linük nung akhümtsübutep maliba kanga bulua kümdar, aser nüburtem longjemer ibaji nokdangtsü atema tensa-i akhanger, aser laia iba nungji ai-aura akar,” ta pai ashi.
Taoba hopta nunga JD(U) lenir aser Bihar Chief Minister Nitish Kumar aser CPI-M General Secretary, Sitaram Yechury natia Sonia Gandhi ajurua Tir election dak sentakba nung o lemtepa liasü.