CPI-M-i Rajya Sabha nung ‘Aadhaar bill’ mapa akümtsü ashitsü akok

New Delhi, March 15 (Agencies): CPI-M-i taoba Bodhbarnü Rajya Sabha nung agizüka yua aliba Aadhaar bill, mapa küma aotsü asoshi ashitsü renema lir.
Opposition-i Aadhar bill agi Money bill küma meyipba atema mepelaba yimjak nung ashidang parnoki, iba inyakyim ya sorkari Rajya Sabha nung lokti tilaba ajangbanga inyakba mapa lir, ta ashi.
Communist Party of India-Marxist (CPI-M) lenir Sitaram Yechury-i, Rajya Sabha nung ozü party-i iba bill mapa küma aotsü asoshi pusema ashitsü, ta Mongulbarnü metetdaktsüogo.
“Onoki ozüng yanglushiba nung shilem agitsü….Rajya Sabha nung agizükaji ibaji mapa akümtsü atema Lok Sabha-i yoktsü,” ta Yechury-i osangbenertem dang ashi.
Ajisüaka ozüng koba yanglushiba nung adentsüar pai tejangja mashi.
Congress aser tanga party temi CPI-M nungittsü asü menungittsü ta asüngdangdang, Left leniri, iba inyakyim dak sentakba nung onoki tangar party tem dena olemtepsa kadar,” ta langzü.
Rajya Sabha dak money bills lemtettsü tashi mali aser Lok Sabha nung khen lemtetkaji Rajya Sabha-i anogo 14 tsüngda nung memeyiptsüaka, ibaji joko ozüng amai akümer.
Ano Rajya Sabha dak money bill kecha yanglushitsüa tashi mali.
Aji oda süaka, ozüng yanglushitsü atemabo shidangtsü temeten lir aser parnoki shidangbaji agizüktsü mesüra magizüktsüji Lok Sabha mulung asütsü.
Tatishitsü agi ozüng kar yanglushitsü tetuyuba agütsüba agizüka lira, iba bill ji Lok Sabha nung merenem tashi atatsüsa akümtsü.
Sorkar osang kar ajanga ashiba agi, parnok renema lir aser BJP züngsemtem ajak dang parliament nung Rajya Sabha aser Lok Sabha naprong nung anogo piyong adentsü shiogo.
Opposition-i, Aadhaar bill aser ano tanga bill kar atema olemtep sentong khen thinena alitsü asoshi temelaba asüngdanga liasü.