CPI(M)- Congress naji memeshiba teloktep: Mamata

Baghmundi, March 27 (Agencies): Deobarnü West Bengal Chief Minister, Mamata Banerjee-i, state nung CPI(M) aser Congress na loktepbaji ‘temeshi masü’ ta shia parnok tangatetba maliba party tem lir, anungji taruba assembly election nung parnok nem tamakok ngudakjang, ta ashi.
Tanü Purulia district nung assembly election nüboyim sentong nung jembidang CM, Mamata-i, “CPI(M) aser Congress na teloktepji memeshiba teloktep ka lir. Iba teloktep nung vote kata magütsüi tamakok ngudakjang. Tangatetba maliba teloktepji magizüktsüla,” ta ashi.
Laisa lar party den toktepertem- Left, Congress aser BJP dang, yimtenren yimya ajanga tokteptsüla, ta ashi.
Iba district nung nüburtem atema lar sorkari terenlok mapa inyaktsüogo ta shia Banerjee-i, “Tamalen Maoists telungpurtemi timtem agütsüba tesemtem nung onoki tesünep bener arutsüogo,” ta ashi.
“Taoba mapang Left Front sorkari yimsüsüdang Jangalmahal tesem (West Midnapore, Bankura aser Purulia district nung tribal tesemtem) ajunga nung tetsübu liasü, item tesemtem nung anogoshia nisung tepsetba aser azütokshi liasü,” ta lai shisem.
Tanübo item anogotem tu süogo aser tesem ajak nung tesünep lir,” ta Mamata-isa ashi.
2011 küm nisungtem tetsübu nung liasü aser Jangalmahal nung aonungbo train mesenzü, ajisüaka tangbo linük nung film yanglurtem film tangoktsü atema Jangalmahal-i arur, ta lai ashi.
Banerjee-i, Purulia district kübok Manbazar aser Jhalda na nung sub-division ana tentettsü, ta ashi.
District nung Bandwan aser Balarampur na nunga lai nüboyim sentong nung jembitsü.